Fàilte gu An Lìonra, an litir-naidheachd do dh’Oileanaich Oilthigh na Gàidhealtachd agus nan Eilean. Tha sinn an dòchas gun do chòrd saor-làithean na Càisg riut agus gu bheil thu a-nis deiseil airson na seachdainean mu dheireadh ro dheireadh an teirm. Mur a bheil planaichean agad airson an t-samhraidh, carson nach feuch thu greis-ghnìomhachais shamhraidh PÀIGHTE? Tha tòrr chothroman air feadh na sgìre againn, agus tha e math don CB agad cuideachd!
Tha an ceann-ama airson Maoin Leasachadh nan Oileanach a-nis faisg; is e seo do chothrom rudeigin eadar-dhealaichte a dhèanamh agus a chur ri do leasachadh phearsanta fhad ’s a chuireas tu ri do chuid ionnsachaidh.
Cuimhnich gu bheil An Lìonra cuideachd ri fhaotainn sa Bheurla.
Greis-ghnìomhachais shamhraidh pàighte
Faigh eòlas-obrach pàighte a mhaireas ochd seachdainean agus cuir ris an CB agad le bhith a’ faighinn greis-ghnìomhachais shamhraidh le Talent Scotland. Tha àitean rim faotainn le fastaichean air a’ Ghàidhealtachd agus anns na h-Eileanan. Faigh tuilleadh fiosrachaidh agus cuir iarrtas a-steach an seo.
Mar oileanach aig UHI, am bu toigh leat cothrom pàirt a ghabhail ann an rudeigin beothachail, rudeigin a chuidicheas nad leasachadh pearsanta, a’ togail air do chuid eòlais no a’ toirt sealladh nas fharsainge dhut? Na caill do chothrom, cuir iarrtas a-steach ro 30mh Giblean do Mhaoin Leasachadh nan Oileanach agus dèan feum dha beatha nan oileanach. Cuir iarrtas a-steach an seo
Toraidhean nan Duaisean Teagaisg UHISA
Tha toraidhean nan duaisean teagaisg aig UHISA a-nis rim faotainn. Chuir oileanaich bhòtaichean sa Ghearran agus sa Mhàrt agus thagh pannal de bhreitheamhan na buannaichean. Faigh a-mach cò a bhuannaich an seo
Oifigearan Oileanach nan Lìonraidhean Chuspairean gan iarraidh
A chum ’s gum faodar fios air ais bho oileanaich do dh’Oilthigh na Gàidhealtachd agus nan Eilean a chur am feabhas, tha sinn a’ trusadh ochdnar Oifigearan Oileanach nan Lìonraidhean Chuspairean pàighte, aon do gach lìonra chuspairean. Tha iad ann gus ceangal a dhèanamh leis na h-oileanaich agus am beachdan a thoirt seachad do dh’àireamh de bhuidhnean sgrùdaidh. Faigh tuilleadh fiosrachaidh agus cuir iarrtas a-steach an seo ro 11mh Cèitean.
Urras Tòmas agus Mairead Rodden
Faodaidh oileanaich fo-cheum a th’ air co-dhiù bliadhna ionnsachaidh a choilionadh, oileanaich for-cheum air cùrsaichean teagaisgte neo oileanaich for-cheum a’ dèanamh rannsachadh airson àrd cheum eadar £500 agus £3000 fhaighinn. Is e 8 Ògmhios an ceann-latha dùnaidh. Cuir fios chun Lyndsay MacColl airson tuilleadh fiosrachaidh.
Fo-thaghadh UHISA
Bu chòir do dh’oileanach sam bith a tha airson a bhith air an ainmeachadh anns an fho-thaghadh no a tha airson barrachd fiosrachaidh fhaighinn mu phròiseas an fho-thaghaidh fios a chur chun Melissa no tadhail air làraich-lìn UHISA.
Ainmeachaidhean a’ fosgladh - 23 Giblean
Ainmeachaidhean a’ dùnadh - 27 Giblean
Iomairtean - 3 Giblean - 4 Cèitean
Làithean an fho-thaghaidh - 7 Cèitean - 9 Cèitean
Toraidhean an fho-thaghaidh - 9 Cèitean
Oileanaich UHI a’ dol air cuairt rothair airson carthannas
Tha sgioba goilf UHI air a bhith gu math soirbheachail am bliadhna-sa, agus iad a-nis a’ farpaiseachadh air an ìre nàiseanta, ach tha cosgaisean a bharrachd an luib a bhith a’ cluich aig ìre an RA. Gus coinneachadh ris na cosgaisean seo, tha iad a’ dol air cuairt air na rothairean aca bho Cheann na Tìre do Thaigh Iain Ghròt, is iad a’ falbh air 17 Giblean. Thoir taic dhaibh an seo
Farpais Alba 2050
Tha Ùghdarras Teisteanasan na h-Alba ag obair còmhla ri Gnothachas Albannach sa Choimhearsnachd gus farpais bhrosnachail do dhaoine òga a chruthachadh. Is e co-theacs sìmplidh a th’ ann – cruthaich pìos obrach chruthachail no pròiseact saidheansail a tha a’ sealltainn do lèirsinn fhèin air an ama ri teachd - Alba 2050. Is e 27 Giblean an ceann-latha dùnaidh. Tuilleadh an seo
Iomairt trusadh oileanaich ga chuir air bhog
Gus cuideachadh a bhith a’ lìonadh nan 1000 àitean a bharrachd do dh’oileanaich a fhuair an t-oilthigh airson 2012/13, dh’obraich an sgioba margaideachd le co-obraichean sa chom-pàirteachas gus iomairt trusadh oileanaich ùr a chur air bhog. Coimhead air an t-sanas Tbh
STEM - a’ cumadh a-màireach leat
A bheil ùidh agad ann an Saidheans, Teicneòlas, Innleadaireachd no Matamataig (STEM) agus deagh mhac-mheanmna ort? Carson nach bi thu nad thosgaire STEM?
No cuir iarrtas a-steach don fharpais chruinneil Dè a dèanadh tu leis a’ choimpiutair as cumhachdaiche san t-saoghal?” far am faigh buannaiche an dùbhlain don fheadhainn a tha nas sine na 18 bliadhna a dh’aois £1000 a dh’ionnsaigh na dreuchd aca. Cuir fios chun Oifis STEM airson barrachd fiosrachaidh.
Mum dheidhinn: Thàinig mi do Mhoireabh san Iuchar 2011 agus tha e a’ còrdadh rium glan a bhith a’ fuireach an seo. Dh’ fheuch mi a bhith a’ dol don oilthigh nuair a bha mi 17 no 18 bliadhna a dh’aois, ach cha robh e freagarrach dhomh. Deich bliadhna air adhart, chuir mi romham feuchainn a-rithist agus tha mi glè thoilichte gun do chuir! Tha mi nam mhàthair singilte agus is toigh leam ceòl gu mòr. Feumaidh mi tòiseachadh air sgrìobhadh agus seinn a-rithist, ’s fhada bhon a rinn mi sin.
Mo UHI: Cha robh fios agam dè a bu chòir dhomh a bhith an dùil ris is mi nam phàirt de UHI leis gu bheil an cùrsa agam air-loidhne, ach choinnich mi ri tòrr dhaoine laghach eadhon ged nach eil mi air an àrainn gu tric! Tha an luchd-obrach air a bhith gu math cuideachdail agus tha iad a’ gabhail cùram de na h-oileanaich aca. Is e cùrsa eadar-dhealaichte agus inntinneach a th’ ann. Tha e dùbhlanach ach tha dùbhlain a’ còrdadh rium.
Mo thìde: Chan eil mi ach sa chiad bhliadhna fhathast, agus tha mi air an t-uabhas ionnsachadh mar-thà! Bhrosnaich taobh air-loidhne mo chùrsa mi a bhith a’ feuchainn gus am bi a h-uile duine aig Colaiste Mhoireibh a’ faireachdainn gu bheil iad mar phàirt de UHI, eadar gu bheil iad ag ionnsachadh air-loidhne no aig an àrainn fhèin. Sheas mi airson Riochdaire Cholaiste Mhoireibh anns an taghadh aig UHISA, agus tha mi toilichte gun deach mo thaghadh!
Mo mhiannan: Is e prìomh mhiann agam a bhith ag obair gu cruaidh gus mo cheum a choilionadh. Tha fios agam gum bi e doirbh, agus gur e pròiseas fada a bhios ann, ach tha mi diongmhalta. Is e mo mhiann a bhith a’ toirt do mo nighean a’ bheatha air a bheil i airidh, ri ùine. Tha mi a’ creidsinn nach bu chòir dhuinn na miannan againn a leigeil seachad.
An naidheachd as ùire
Abairt na mìos
Success consists of going from failure to failure without loss of enthusiasm - Winston Churchill
Tachartasan agus trèanadh
Tachartas mu dhreuchdan ann an obair shòisealta
A bheil ùidh agad ann an dreuchd ann an obair shòisealta agus tu ag iarraidh tuilleadh fiosrachaidh mu bhith a’ faighinn a-steach don raon seo? Thig an làthair aig òraid le Wendy Johnston bho Chomhairle Sheirbheisean Shòisealta na h-Alba Dihaoine 4 Cèitean, 12:00-13:00 aig Colaiste Inbhir Nis UHI no le VC. Cuir fios chun Helen Anton gus àite a ghleidheadh.
Seirbheisean oileanach
A bheil rudeigin agad ri a innse dhuinn?
Is e a th’ anns a’ phutan dhearg cothrom do dh’oileanaich uile innse dhuinn mu phàirt sam bith den àm agad mar oileanach aig UHI. Thuirt neach-cleachdaidh o chionn ghoirid “Tha mi gu math sàsaichte gu bheilear ag èisteachd ri beachdan nan oileanach agus a’ tabhann comhairle a tha an dà chuid freagarrach agus practaigeach”. Chaidh inbhean seirbheis a chruthachadh o chionn ghoirid cuideachd, a tha a’ toirt mion-chunntas air na tha am Putan Dearg a’ tabhann, cò a bhitheas a’ cur feum air an t-seirbheis agus na as urrainn dhut a bhith an dùil ris agus tusa a’ cur feum air. Leugh an seo.
Comhairlichean oileanach gan iarraidh
Tha sinn an-dràsta a’ trusadh chomhairlichean ùra aig a h-uile àrainn UHI, agus oileanaich air-loidhne. Gheibh thu trèanadh a leigeas leat oileanaich ùra a chuideachadh bho thoiseach an ath bhliadhna acadaimigeach.
Thathas a’ brosnachadh a h-uile oileanach a bhith a’ cur iarrtas a-steach, faigh tuilleadh fiosrachaidh an seo no cuir fios chun Kevin.
Sgeama Steigearan Doille-fhaclan
Tha an Sgeama steigearan doille-fhaclan aig UHI ri faotainn do dh’oileanaich a fhuair breithneachadh oifigeil gu bheil doille-fhaclan orra agus bidh e a’ leigeil fios don neach-oide a tha a’ comharrachadh obair gu bheil feumalachdan taice doille-fhaclan agad.
Ma tha thu am beachd gum faigheadh tu buannachd às a bhith a’ cur feum air sgeama steigearan doille-fhaclan, bu chòir dhut bruidhinn ri luchd-obrach nan seirbheisean taice aig do cholaiste no fios a chur chun Mark Ross.
Suirbhidh LIS -
Buidhinn maide cuimhne 4GB
Uair sam bith a gheibh thu post dealain fèin-obrachail ag innse gu bheil glaodhaich a chuir thu chun an deasg chuideachaidh an dèidh bhith air a dhùnadh, gheibh thu cothrom suirbhidh a lìonadh mun t-seirbheis a fhuair thu. Gach mìos thèid a h-uile suirbhidh a chaidh a lìonadh a chur ann an crannchur airson maide cuimhne 4GB a bhuidhinn. Thèid fios a chur a dh’ionnsaigh gach buannaiche fa leth agus thèid an ainmean fhoillseachadh air làraich-lìn LIS.
Naidheachdan eile
A bheil thu airson a bhith air an Tbh?
Tha Dragonfly Productions, a th’ air duaisean a bhuannachadh, a’ dèanamh sreath eachdraidh agus innleadaireachd ùr air a bheil Beat the Ancestors do Channel 5. Bheir an t-sreath dùbhlan do bhuidheann de dh’innleadairean fireann agus boireann innealachdan ainmeil a dh’atharraich eachdraidh a dh’ath-thogail. Tha iad an-dràsta a’ sireadh innleadairean a ghabhas pàirt ann! Ma tha ùidh agad ann, cuir fios chun beattheancestorsno cuir fòn chun 020 3487 1214.
Farpais an Guardian 2012 - fosgailte do dh’oileanaich a tha airson a bhith nan sgrìobhadairean
Sgrìobh artaigil de 650-1000 facail a dh’fhaide air taobh de bhochdainn chruinneil air a chòmhdachadh anns na teamaichean air am mìneachadh agus luchdaich suas e a’ cleachdadh an fhoirm iarrtais air-loidhne air làraich-lìn na Guardian. Ceann-latha dùnaidh - 3 Cèitean.
An Dùbhlan Converge
Tha an Dùbhlan Converge a’ sireadh an ath ghinealaich de luchd-tionnsgain ann an Oilthighean na h-Alba, agus tha £25,000 de dh’airgead againn gus gnothachas gealltanach cuideachadh. Ma tha beachd agad airson gnothachas agus tu airson dol an sàs ann, theirig chun làrach-lìn an Dùbhlain Converge.
Hoodies rin reic!
Faodaidh tu hoodies UHI a cheannach airson £14.99 a-mhàin. Tha iad rim faotainn ann am purpaidh, dubh no liath agus an diofar meud. Faodaidh tu gan ceannach bhon bhùth aig UHISA no bhon oifis aig Katrina no Nathan aig Colaistean Mhoireibh agus Peairt UHI.
Adopt an Intern
Bidh Adopt an Intern a’ tabhann chothroman do cheumnaichean a bhith a’ faighinn eòlas-obrach pàighte, luachmhor. Is e an t-amas againn cultar seasmhach, ceart agus ruigsinneach a stèidheachadh do dh’fholaintich air feadh Alba. Tuilleadh mu chothroman air a’ Ghàidhealtachd an seo
Iomairt sàbhailteachd rathaidean
Nuair a bhios tu a’ siubhail do dh’àrainn eile airson geama spòrs, no a’ dràibheadh dhachaigh aig deireadh an teirm, ’s fhiach e cuimhneachadh gu bheil trì a-mach a ceithir bàis air rathaidean na h-Alba a’ tachairt air rathaidean dùthchail. Coimhead air an t-sanas a tha an-dràsta a’ nochdadh an taighean-dhealbh an seo
Tha thu a' faighinn a' phuist-d seo leis gur e oileanach Oilthigh na Gàidhealtachd agus nan Eilean a th'annad. Nam b'fheàrr leat gun a bhith a'faighinn a'phuist-d seo, thoir d'ainm far na liosta.
