16/3 2011

Rasisti! Ekki ég! Er það?

Nú stendur yfir Evrópuvika gegn kynþáttamisrétti. Unglingar úr æskulýðsfélögum kirkjunnar taka þátt í uppákomum í Smáralind og á Glerártorgi fimmtudaginn 17. mars.

„Við viljum koma því á framfæri að fordómar eiga ekki að vera til staðar. Við viljum afhjúpa hvaðan þeir koma, innflytjendur verða fyrir fordómum og börn þeirra fyrir einelti í skólum,“ segir Guðjón Andri Reynisson, æskulýðsleiðtogi í Neskirkju, sem tekur þátt í uppákomunni í Smáralind.

Þema Evrópuvikunnar í ár er „Rasisti! Ekki ég! Er það?“ og miðar að því að taka á duldum fordómum gagnvart fólki af erlendum uppruna. Í ár er lögð sérstök áhersla á að hvetja fólk til að líta í eigin barm og spyrja sjálft sig, á þetta við mig og ef svo er – hversvegna, og hvernig get ég gert betur?

• Frétt um Evrópuvikuna á kirkjan.is
• Kynning á Evrópuvikunni á vef Mannréttindaskrifstofu Íslands
• Myndir frá Evrópuvikunni 2008
• Pistlar og prédikanir um fordóma á trú.is

Efst

Bænir fyrir Japan

Bænastund verður haldin í Háteigskirkju fimmtudaginn 17. mars kl. 18:00. Þar verður beðið fyrir japönsku þjóðinni, þeim sem eiga um sárt að binda vegna náttúruhamfaranna og fyrir ættingjum og vinum í landinu.

Ritningarlestrar, bænir, tónlist og kyrrð munu einkenna þessa stund og viðstöddum gefst kostur á að kveikja á bænaljósum. Bænastundin er í umsjá sr. Helgu Soffíu Konráðsdóttur, sr. Toshiki Toma og sr. Miyako Þóðarson. Allir eru hjartanlega velkomnir.

Efst

Bleiki dagurinn í Guðríðarkirkju

Bleikklæddur kirkjukór leiddi söng í Guðríðarkirkju í Grafarholti sunnudaginn 13. mars þegar bleiki dagurinn var haldinn í þriðja sinn þar. Messan var helguð jafnrétti og meðal annars sungnir sálmar sem ortir voru af konum. Fluttar voru bænir og textar frá alþjóðlegum bænadegi kvenna.

• Prédikun Yrsu Þórðardóttur á Trú.is
• Myndir frá Bleika deginum

Efst

Hvar erum við stödd?

Í hve miklum mæli dafna kynþáttafordómar hér á landi? Hvað er gert til að sporna við þeim? Þessar og fleiri spurningar verða ræddar á málþingi Þjóðmálanefndar kirkjunnar um kynþáttafordóma sem verður haldið á Alþjóðadegi gegn kynþáttamisrétti, mánudaginn 21. mars. Hægt er að skrá þátttöku á Facebook.

Efst

Passíusálmarnir á vefnum

Passíusálmarnir eru ávöxtur ævilangrar íhugunar í eftirfylgd hins krossfesta, ævilangrar glímu við Guð í baráttu og barningi, sigrum og ósigrum, smán og sóma langrar ævi. Á kirkjan.is er hægt að lesa alla Passíusálmana.

• Passíusálmarnir á vefnum
• Fastan, Passíusálmarnir og trúarlífið á trú.is

Efst