24.03.2021

Tae & Plé - an chéad seisiún eile ar siúl ag deireadh mhí Aibreáin!

Seo meabhrú daoibh le rá nach mbeidh an seisiún Tae & Plé ar siúl ag deireadh na míosa seo toisc go mbeidh na naíonraí dúnta don Cháisc. Tá muid ag súil go mór le casadh arís ag deireadh na míosa seo chugainn.

Beidh an chéad seisiún Zoom eile ar siúl ar an gCéadaoin 28.04.2021 idir 19.00-20.00.

Tugann na seisiúin Tae & Plé deis do mhúinteoirí naíonra teacht le chéile ar líne chun na cúrsaí is déanaí a phlé, tacaíochtaí cuí a aithint agus foghlaim óna chéile. Ní ga clárú ach uair amháin agus seolfar an nasc chugat gach mí. Is féidir díchlárú ag am ar bith trí ríomhphost a sheoladh chugainn.

Tá muid ag glacadh le hiarratais don chéad téama eile anois. Cad ar mhaith leat a phlé sa chéad seisiún eile? An bhfuil aon cheist agat do stiúrthóirí eile? Seo an deis leis na ceisteanna sin a ardú. Seol bhur moltaí / ceisteanna chuig katie@gaeloideachas.ie. Is féidir go mbeidh spreag cheisteanna againn ó am go chéile leis an bplé a threorú agus a éascú, agus táimid an-oscailte do mholtaí ina leith.

Aiseolas ón seisiún Tae & Plé, mí Feabhra

Bhí slua breá i láthair don Tae & Plé ar an 24 Feabhra le smaointe agus taithí a roinnt ar a chéile maidir le riachtanais speisialta oideachais (RSO) sa naíonra. Táimid an-bhuíoch as bhur gcomhluadar ann, agus chomh fial is a mbíonn sibh leis na scéalta a roinnt linn. Cabhraíonn sé linn pleanáil níos fearr le freastal ar bhur riachtanais, agus leis an leas is fearr a bhaint as na hacmhainní atá againn. Is féidir an tuairisc ar na mórphointí a tháinig chun cinn a léamh tríd an nasc thíos.

Cuntas YouTube a chruthú don Naíonra

Buntáistí a bhaineann le cuntas YouTube a bhunú
• Cabhraíonn na físeáin amhránaíochta agus drámaíochta leis an saibhreas agus sealbhú teanga
• Is féidir na físeáin uilig a stóráil in aon áit amháin
• Bíonn rochtain agat ar na bhfíseán go tapa agus go héasca
• Is féidir smaointí a mhalartú le daoine eile, ó thaobh an cheoil, drámaíocht, scéalaíocht de, srl.
• Is féidir seinnliostaí éagsúla a chruthú agus a rangú
• Is acmhainn bhreise don seomra ranga í
• Is uirlis mhaith í le caidreamh a chothú le tuismitheoirí sa bhaile
• Is poiblíocht iontach don naíonra é, is féidir an cuntas a roinnt le tuismitheoirí nua ag oícheanta eolais srl

Is féidir teacht ar na treoracha chun cuntas a chruthú anseo.

Sealbhú Teanga Tríd an Drámaíocht sa Naíonra

An raibh deis agat freastal ar an gceardlann le Fil Uí Dhubhghaill ag tús na míosa seo? Roinn sí an t-uafás dea-chleachtais agus modhanna éagsúla chun an drámaíocht a dhéanamh leis na páistí sa seomra ranga. Mura raibh deis agat freastal ar an oíche, is féidir breathnú siar air thuas.

Féach siar ar na ceardlanna eile a bhí ar siúl le déanaí anseo.

Cruinnithe luathbhlianta ag teacht chun cinn

Bíonn Clare ag feidhmiú mar ionadaí na heagraíochta ag na cruinnithe do pháirtithe luathbhlianta, agus tá go leor ar an sceideal sna míonna amach romhainn, ina measc: 

• Comhairliúcháin maidir leis an bhfeachtas Bímís Réidh!  

• Comhairliúcháin maidir le plean forbartha do lucht saothair na luathbhlianta agus múnla maoinithe nua don earnáil 

• Coiste osradharc na Gaeilge maidir le cur i bhfeidhm na straitéise Céad 5 

• Cruinnithe maidir le proifisiúnú earnáil na luathbhlianta 

• Fóram comhairliúcháin Tusla 

• Cruinnithe an NVCC (Comhar Náisiúnta Deonach um Chúram Leanaí)  

Roinnfear eolas de réir mar is cuí maidir le dul chun cinn ag na cruinnithe seo sna nuachtlitreacha. Tá iarrachtaí leanúnacha ar bun le dul i bhfeidhm ar na forais Stáit agus ar na heagraíochtaí deonacha eile le freastal níos fearr a dhéanamh ar riachtanais na naíonraí, i gcomhpháirt lenar gcomhghleacaithe i gComhar Naíonraí na Gaeltachta.  

Má tá aon cheist agat ina leith, tá fáilte i gcónaí roimh teagmháil le Clare trí ríomhphost a sheoladh chuici: clare@gaeloideachas.ie.

Faigh acmhainní agus scéalta eile do naíonraí thíos: