18.02.2021

Tae & Plé na míosa seo bunaithe ar an téama: Sealbhú Teanga & RSO sa Naíonra

Ba mhaith linn deis a thabhairt do mhúinteoirí naíonra teacht le chéile ar líne chun na cúrsaí is déanaí a phlé, tacaíochtaí cuí a aithint agus foghlaim óna chéile.

Beidh an chéad seisiún Zoom eile ar siúl ar an gCéadaoin 24.02.2021 idir 19.00-20.00.

Eagrófar teacht-le-chéile neamhfhoirmiúil gach mí, ar an gCéadaoin dheireanach mura gcuirtear a mhalairt in iúl. Ní ga clárú ach uair amháin agus seolfar an nasc chugat gach mí. Is féidir díchlárú ag am ar bith trí ríomhphost a sheoladh chugainn.

Foilseofar achoimrí beag ar an bplé go rialta i Nuachtlitir na Naíonraí ach ar ndóigh ní roinnfear aon eolas pearsanta agus déanfar cinnte de i gcónaí gur spás tacúil, taitneamhach a bheidh sa Tae & Plé.

Díreofar ar théama Sealbhú Teanga & RSO sa Naíonra don mhí seo, agus má tá ceist ar bith agat, seol chuig katie@gaeloideachas.ie é. Is féidir go mbeidh spreag cheisteanna againn ó am go chéile leis an bplé a threorú agus a éascú, agus táimid an-oscailte do mholtaí ina leith.

Is féidir breathnú siar ar an gceardlann 'Sealbhú agus Forbairt Teanga sa Naíonra: Béim ar RSO' anseo.

Ceardlann bunaithe ar an suíomh GaeilgedonNaionra.ie

GaeilgedonNaionra.ie mar Acmhainn Foghlama dóibh siúd atá ag iarraidh cur lena muinín sa Ghaeilge i suíomh an naíonra.

Dírithe ar: Múinteoirí Naíonra atá ag iarraidh Gaeilge a fhoghlaim agus éinne ar spéis leo obair na naíonraí.

Am agus áit: 23 Feabhra 2021, 19.00, Zoom

Aoichainteoir: Ailín Ní Chonchuir, Lárionad na Gaeilge: Taighde, Teagasc agus Tástáil, Ollscoil Mhá Nuad

Le linn an tseimineáir seo, míneofar conas an suíomh GaeilgedonNaionra.ie a úsáid chun cabhrú leo siúd atá ag iarraidh cur lena muinín sa Ghaeilge i suíomh an naíonra. Sa cheardlann phraiticiúil seo gheobhaidh rannpháirtithe léargas ar conas an leas is fearr a bhaint as an suíomh mar acmhainn fhéinteagaisc.

D’fhorbair Gaeloideachas an suíomh seo agus tá sé maoinithe ag Foras na Gaeilge. Forbraíodh é mar acmhainn dóibh siúd atá ag obair i Naíonraí agus atá ag iarraidh cur lena muinín sa Ghaeilge, agus dóibh siúd atá ag iarraidh cur lena líofacht sa Ghaeilge le bheith ag obair i Naíonraí amach anseo.

Ceardlann bunaithe ar Sealbhú Teanga tríd an Drámaíocht sa Naíonra

Am agus áit: 3 Márta 2021, 19.00, Zoom

Aoichainteoirí: Fil Uí Dhubhghaill

Le linn an tseimineáir seo, roinnfear moltaí ar an dea-chleachtas is éifeachtaí ó thaobh fhorbairt an dara teanga de tríd an drámaíocht. I measc na moltaí, beidh:

• Rannta, dánta agus amhráin
• Cluichí drámaíochta
• Ábhar praicticiúil a theastaíonn chun an drámaíocht a dhéanamh
• Treoirlínte chun dráma a léiriú ar stáitse

Is iar-mhúinteoir agus príomhoide bunscoile í Fil a chaith breis agus 23 bliain ag múineadh ranganna na Naíonán i Scoil Cholmcille, An Tulach Co. na Gaillimhe. Nuair a chuaigh sí ar luath scor i 2014 bhain sí céim máistreachta amach- M.Oid san Oideachas Lán-Ghaeilge- i gColáiste Mhuire gan Smál leis an tráchtas “Tionchar na Drámaíochta ar shealbhú agus ar shaibhriú na Gaeilge i Rang Naíonán Sóisearach i Scoil Ghaeltachta”. Ó 2016 tá sí ar ais i gColáiste Mhuire gan Smál mar léachtóir agus mar theagascóir páirt-aimseartha. Tá a lán ceardlanna drámaíochta déanta aici le scoláirí in OÉGaillimh agus le grúpaí de mhúinteoirí bunscoile.

Tá an cheardlann seo dírithe ar mhúinteoirí naíonra ach go háirithe agus orthu siúd le suim agus nasc acu le naíonraí. Is gá clárú don cheardlann seo agus is féidir sin a dhéanamh tríd an nasc thíos.

Cáipéisí TUSLA dírithe ar Thuismitheoirí ar fáil as Gaeilge anois

Tá áthas orainn a fhógairt go bhfuil cáipéisí TUSLA a bhaineann le tuismitheoirí / caomhnóirí anois ar fáil as Gaeilge. Tá na cáipéisí seo an-úsáideach le roinnt le tuismitheoirí atá ag smaoineamh ar naíonra a roghnú nó atá eolas ginearálta uathu maidir leis an tseirbhís.

'Más tuismitheoir tú a úsáideann nó a dteastaíonn uait seirbhís luathbhlianta a úsáid do do pháiste, gheobhaidh tú go leor eolais anseo a chabhróidh leat do chinneadh a dhéanamh. Ina measc, tá clár na seirbhísí luathbhlianta, na tuairiscí cigireachta is déanaí do gach seirbhís, chomh maith le heolas agus nodanna maidir le cad ba cheart a lorg agus seirbhís á roghnú agat.' -  Féach ar na gcáipéisí atá ceagailte thíos chun breis eolais a fháil. Ní gá ach brú ar an gcnaipe Béarla chun teacht ar an leagan Gaeilge. Mar shampla, 'Choosing an early years service' --> 'Ag roghnú seirbhíse luathbhlianta'.

Faigh acmhainní agus scéalta eile do naíonraí thíos: