Fullt út úr dyrum á Ársfundi atvinnulífsins

Fullt var út úr dyrum í Silfurbergi í Hörpu á Ársfundi atvinnulífsins sem haldinn var 2. október síðastliðinn. Fundurinn var að þessu sinni helgaður útflutningsgreinunum og mikilvægi þeirra fyrir samfélagið undirstrikað.

Samtök atvinnulífsins þakka öllum þeim sem komu í Hörpu eða horfðu á beint streymi frá fundinum.

Krafturinn sem knýr samfélagið

„Í því að stofna og reka fyrirtæki felst þrá til að ráða örlögum sínum og hafa áhrif á framtíðina. Í því felst það að skapa tækifæri og verðmæti fyrir samfélagið sitt. Íslenskt samfélag þarfnast þess krafts til að viðhalda lífsgæðum.“ 

Jón Ólafur Halldórsson, formaður, opnaði Ársfund atvinnulífsins með kraftmiklu ávarpi.

Kol­efnis­gjöld og kjara­samningar

„Skapa þarf svigrúm til skattalækkana með forgangsröðun í opinberum rekstri. Auka þarf framboð á hagkvæmri orku og fjárfesta þarf í innviðum með samvinnu hins opinbera og einkaaðila. Setja þarf aukinn kraft í hagsmunagæslu á alþjóðavettvangi og stuðla þarf að fjölbreyttari útflutningi. Gera þarf umbætur í menntakerfi og auka aðgengi sérfræðinga.“ 

Sigríður Margrét Oddsdóttir, framkvæmdastjóri Samtaka atvinnulífsins, fjallaði um mikilvægi útflutnings fyrir Ísland, tækifæri og áskoranir, í grein í Viðskiptablaðinu.

Óháð úttekt fari fram áður en ný sóttvarnarlög verði samþykkt

Samtök atvinnulífsins hafa skilað umsögn um frumvarp til nýrra sóttvarnalaga og leggja áherslu á að lögin verði ekki samþykkt fyrr en óháð úttekt hefur farið fram á viðbrögðum stjórnvalda við heimsfaraldrinum. SA telja nauðsynlegt að ný lög byggi á traustum grunni, með heildarmati á stjórnskipulegum, efnahagslegum og lýðheilsufræðilegum áhrifum faraldursins. Þá gera samtökin athugasemdir við skipan farsóttanefndar og skort á lýðræðislegri aðkomu Alþingis að sóttvarnaráðstöfunum, auk þess sem þau kalla eftir skýrari viðmiðum og auknu gagnsæi við ákvarðanatöku stjórnvalda.

Umræður um útflutning í Bítinu

Jón Ólafur Halldórsson, formaður SA, og Sigríður Margrét, framkvæmdastjóri SA, mættu í Bítið á Bylgunni að morgni Ársfundardags og ræddu um stöðu útflutningsgreinanna og horfur fram á veginn.

Byrjað á öfugum enda

Anna Hrefna Ingimundardóttir, aðstoðarframkvæmdastjóri Samtaka atvinnulífsins, segir í grein í Viðskiptablaðinu að í ljósi óvinsamlegrar umræðu í garð ferðaþjónustu skyldi engan undra þó greinin spyrji sig hvort hún sé næst á gapastokkinn.

Ótímabær innleiðing flugreglugerðar ESB um sjálfbært eldsneyti

Samtök atvinnulífsins, Samtök ferðaþjónustunnar og Samtök verslunar og þjónustu hafa skilað sameiginlegri umsögn um frumvarp til innleiðingar reglugerðar ESB um sjálfbært flugeldsneyti (ReFuelEU). Samtökin styðja markmið um orkuskipti og kolefnishlutleysi, en vara við því að reglugerðin sé innleidd hér á landi áður en hún hefur verið tekin upp í EES-samninginn og án fullnægjandi greiningar. Samtökin leggja áherslu á að tryggt verði víðtækt samráð og að áhrif lagasetningar á atvinnulífið verði metin á traustum grunni.

Markvissara ferli getur dregið úr því að fólk detti út af vinnumarkaði

„Með markvissari hætti getum við náð niður veikindafjarvistum og dregið, sem er mikilvægast, úr því að einstaklingar séu að detta út af vinnumarkaði. Allar rannsóknir sýna að eftir því sem við grípum fyrr inn, með skipulagðari og markvissari hætti, því betri árangur getur náðst,“ sagði Guðmundur Heiðar Guðmundsson, lögmaður á vinnumarkaðssviði SA, í kvöldfréttum Ríkissjónvarpsins þann 19. september.

SA fagnar einföldun heilbrigðiseftirlits

Samtök atvinnulífsins fagna áformum stjórnvalda um að fækka heilbrigðiseftirlitsaðilum úr ellefu í tvo. Markmiðið með breytingunum er að einfalda regluverk, bæta þjónustu, lækka kostnað og auka skilvirkni í leyfisveitingum og eftirliti.

Umsögnina má lesa í heild sinni á heimasíðu SA.

Grípa þarf fólk fyrr í veikindum

Lykilatriði er að grípa fólk snemma í veikindum sínum til að fyrirbyggja að það falli utan vinnumarkaðar. Þetta er meðal þess sem kom fram á árlegum vinnufundi SA með systursamtökum sínum á Norðurlöndunum sem fram fór í Osló í síðustu viku.

Á hinum Norðurlöndunum er til staðar skipulagt fyrir fram ákveðið ferli sem miðar að því að koma starfsmanni, í veikindaleyfi, sem fyrst aftur til starfa. Ferlið byggist á samstarfi starfsmanns, atvinnurekanda og læknis. Þessu er ekki til að dreifa á Íslandi þar sem starfsmaður getur verið utan vinnumarkaðar í veikindaleyfi svo mánuðum skiptir án nokkurs stuðnings eða meðhöndlunar.

Opið fyrir innsendingar til Umhverfisverðlauna atvinnulífsins 2025

BM Vallá hlutu verðlaunin fyrir Umhverfisfyrirtæki ársins á deginum í fyrra.

Samtök atvinnulífsins og aðildarsamtök hafa opnað fyrir tilnefningar til Umhverfisverðlauna atvinnulífsins 2025. Hvetja samtökin aðildarfyrirtæki til að senda inn tilnefningar eigi síðar en 20. október 2025.

Verðlaunin verða veitt við hátíðlega athöfn á Umhverfisdegi atvinnulífsins í nóvember, sem haldinn verður á Hilton Reykjavík Nordica.

Veitt verða tvenn verðlaun:

• Umhverfisfyrirtæki ársins
• Framtak ársins

Tilnefna þarf fyrirtæki sérstaklega undir hvorn flokk en einnig er heimilt að tilnefna sama fyrirtækið í báða flokka.

Dómnefnd velur úr innsendum tilnefningum en til að þær teljist gildar þurfa fyrirtæki að uppfylla sett viðmið og ítarlegur rökstuðningur að fylgja með. Aðeins skráð aðildarfyrirtæki Samtaka atvinnulífsins og aðildarsamtaka þeirra geta hlotið tilnefningu.

Við erum alltaf á vaktinni

Samtök atvinnulífsins vinna markvisst að hagsmunagæslu í þágu atvinnulífsins og því að tryggja íslensku atvinnulífi samkeppnishæf starfsskilyrði - landsmönnum öllum til hagsbóta. Mikilvægur liður í þeirri vinnu er að vakta þingmál er varða félagsmenn og atvinnulífið í heild og berst SA jafnframt mikill fjöldi þingmála til umsagnar.

Síðustu umsagnir SA má lesa á heimasíðu SA.

Gott að vita