Kua mārō te haere o ngā mahi i tētahi rori ikiiki matua i roto i te takiwā mahi 'Rohe 4', kei te taha rāwhiti o te huarahi matua e whakahāngaitia ana e pātata ana ki WoodVille.

Kei te pai te haere o ngā mahi hangatanga

E tino hari ana mātau i te pai o te anga whakamua o ngā mahi karikari whenua nui, ā, neke atu i te 130,000 mita pūrua kua nekehia i tēnei wā. I roto i te roanga atu o te kaupapa e ono miriona mita pūrua ka nekehia e mātau.

Kei te wā tika ngā mahi, kei mua rānei i te hōtaka, otirā kei mua noa atu te haere o ngā mahi i te taha uru o te huarahi matua. Kua tino rerekē haere te āhua o tēnei wāhanga i ēnei marama e rua nei, ā, ka kitea ngā huringa mai i ētahi wāhanga o Ashhurst.

Heoi, i ētahi atu wāhi kei te whakatūria ngā kaupapa mō te Piriti o Parahaki – he hanganga 300m o te huarahi matua i runga ake i te Awa o Manawatū. E toru ngā poutoko o te piriti, ko tētahi kei roto i te awa, ā, ko ētahi kei ngā tāhuna.

I te wāhi o te pāmu hau, kei te hangaia e mātau ngā tūāpapa o te ara raro o te kaupapa (he tuku kuhunga mō ngā ariki whenua) i te Rori o Morgan. I roto i ngā marama e ono nei ka hangaia te papa raima, ngā pātū me te tuanui o te ara raro ki reira tonu, whai muri ko ngā pātū maioro kia hipa te rori i runga ake.

I te taha rāwhiti o te huarahi matua, e arotahi ana mātau ki te whakaoti i te rori ikiiki matua me ngā whakamaunga whakahaere horo me te parataiao mō ngā wāhi karikari hira. Kei te mahi anō mātau ki te whakatū i ngā whakaurunga manga ka whakarite kia tūtorotika ngā maioro mō te wā roa.

Kei te mahi tonu tō mātau rōpū ki te whakatū taiepa i ngā pāmu a Te Kunenga ki Pūrehuroa i Tuapaka me te pāmu a te whānau Beagley, ā, ko te tikanga ka whakatōhia ngā tipu i te tīmatanga o Mei ina tika ana te huarere. Kei roto ēnei mahi i te paiherenga o te kaupapa ki te whakatipu i ngā momo tipu tata ki te rua miriona i te wā o te waihanga i te huarahi matua.

Ngā pikitia i raro: Kua tīmata ngā mahi tōmua mō te Piriti o Parahaki (runga) me te ara raro i te Rori o Morgan (waenganui); Raro: Kei te haere tonu ngā mahi whakatū taiepa i te Pāmu o Beagley i mua i te tīmatanga o te whakatipu i te Mei.

Te hāereere i roto i tō tātau hapori

I puta ētahi o ngā kaimahi mai i te kaupapa ki te tūtakitaki i te hau kāinga i te Central Districts Field Days i te Maehe (pikitia i raro).

I tō mātau wāhi ko tētahi mapi nunui o te ara huarahi matua hou, me tā mātau pūmanawa rorohiko 'taraiwa i te huarahi matua' pāhekoheko e taea e koe te taraiwa, ā, ka haere i te ara 11.5km ka hangaia i waenga i a Ashurst me Woodville.

E rikarika ana mātau ki ētahi atu wā tūtakitaki i te hapori hei te Mei i ētahi hui tuku mōhiohio tūmatanui puta noa i te rohe (kei raro ngā taipitopito). I tua atu i tēnei, kua tata te oti o tā mātau pokapū mōhiohio manuhiri kei tā matau tari e pātata ana ki Ashurst, ā, kua tīmata ngā mahere mō te whakaatu i ngā mōhiohio mō te kaupapa i Woodville.

He nui ngā tāngata i tae atu ki ngā hui tuku mōhiohio e rua a te rōpū rapu ratonga o Te Ahu a Tūranga i te pito o Pepuere, i Tāmaki Nui a Rua me Te Papaioea. Ko ngā huihuinga i te ahiahi mā ngā pakihi o te rohe i te hiahia ki te mōhio me pēhea te tono mō ngā mahi i te huarahi, me ngā whakamārama mō te tukanga whai ratonga me ngā tautoko katoa e wātea ana hei āwhina i ngā pakihi kia angitu ai te tono.

Ngā Hui Tuku Mōhiohio Tūmatanui

18 Mei 2021 Pahīatua: Bush MultiSport Park, 57 Te Tiriti o Huxley, 4-6pm

19 Mei 2021 Ashhurst: Tari Wāhi Mahi, 1600 Te Rori o Napier, 4-6pm

20 Mei 2021 Woodville: Woodville Sports Stadium, 64 Ross Street, 5-7pm

25 Mei 2021 Tāmaki Nui a Rua: Dannevirke Sports Centre, 6 Te Rori o Anderson, 4-6pm

I tae atu te hunga pāpāho o te rohe me te motu ki te taiopenga onā tata nei i te nekehanga o ngā kōiwi moa ki Te Manawa, Te Whare Taonga o Te Papaioea.

I kitea ngā kōiwi moa tawhito

I pānui pea koe i ngā kōrero mō tēnei kitenga i te wāhi mahi i tērā marama.

I ahu mai ngā kōiwi mai i ngā moa e rua i te iti rawa i kitea i roto i ngā mahi karikari, ā, whai muri i te kitenga tuatahi i te 9 o Maehe, i kitea ētahi atu kōiwi tae atu ki tētahi whaturei me ngā rara. E ai ki ngā tūhuratanga tuatahi e hia mano tau pea te tawhito o ngā kōiwi.

Nā ngā māngai o te iwi i whakahaere ngā karakia i te ata hāpara ki te neke i ngā kōiwi ki Te Manawa, Te Whare Taonga o Te Papaioea – i tēnei marama.

I whakawhiwhia a Te Ahu a Tūranga i tētahi tohu hanga mahere ā-motu

Kua whakamanatia Te Hononga o Te Ahu a tūranga: Te Huanui o Manawatū-Tararua e te rāngai hanga mahere o te motu, i toa i a rātau te Tohu Tikanga Tiketike a te New Zealand Planning Institute mō ngā rautaki, tukanga/rānei mō te whakawhitiwhiti kōrero me te whai wāhi mai.

Ko te iho o te tohu ko te tūranga hira o te pātuitanga me te iwi i roto i ngā wāhanga whakamahere o te kaupapa, ko te otinga atu ko tētahi taumata 'tuatahi' i taea: ko Te Ahu a Tūranga: Te Huanui o Manawatū-Tararua te kaupapa hanganga nui tuatahi o Aotearoa i whai wāhi mai te iwi mai i te tīmatanga, hei hoa pātui kaupapa i te taumata poari whakahaere me ngā tūranga puta noa i te Hononga.

Ko te kī a te Kaiwhakahaere Takawaenga ā-Iwi, o Waka Kotahi a Lonnie Dalzell: "E whakaatu ana a Te Ahu a Tūranga i tētahi āhuatanga hou mō ngā whanaungatanga Iwi-Karauna, ā, he ara tēnei mō tētahi tauira pātuitanga mō te waihanga ngātahi i ngā hanganga i Aotearoa.

"E whakaatu ana te tohu i ngā mahinga nui i oti ki te tuitui i tētahi pātuitanga tūturu, mā te whai i ngā mātāpono o Te Tiriti o Waitangi i ārahi."

Ka tino pai ake te haumaru me te āhua o te rori i ngā whakapaipai e heke iho nei.

Ka kati te Rori o Saddle i te Āperira me Mei mō ngā whakapaipai waiwai

Ahakoa kāore ēnei i roto i te kaupapa Te Ahu a Turanga, me mōhio koe ki ngā katinga e whai ake kua whakaritea mō te Rori o Saddle.

Ka katia te Rori o Saddle mō ngā whakapaipai waiwai ki te ara i ngā wā rerekē mai i te 18 o Āperira ki te 14 o Mei. Ka tino pai ake te haumaru me te āhua o te rori i ngā whakapaipaitanga.

He uaua te tiaki i te rori whāiti, tūpou me te hauhau, ā, he wāhi uaua ki te mahi i te nui haere o ngā waka mai i te katinga o te Āpiti o Manawatū – nō reira me kati kia tino whai wā ai ngā kaimahi ki te whakaoti i ngā mahi kia haumaru, kia kakama, ā, kia tiketike te taumata.

E ai ki ngā huarere, ānei te hōtaka mō ngā katinga:

• Rātapu 18 – Tāite 22 Āperira (kati mō te rima pō)
Pō: 6pm-6am

• Mane 26 Āperira (kati mō te pō kotahi hei te Rā o Anzac)
Pō: 6pm-6am

• Tūrei 27 – Paraire 30 Āperira (kati mō ngā rā e whā i te awatea me te pō)
Rā: 9am-4pm
Pō: 6pm-6am

• Mane 3 – Paraire 7 Mei (kati mō ngā rā e rima i te awatea) 
Rā: 9am-2:30pm

• Mane 10 – Paraire 14 Mei (kati mō ngā rā e rima i te awatea)
Rā: 9am-2:30pm

Ka tonoa mā te Ara o Pahīatua. Ka tuwhera te Rori o Saddle ki ngā kainoho, ngā kaimahi o te kaupapa Te Ahu a Tūranga me ngā urunga ohotata i ngā wā katoa.

Ētahi atu kōrero

Mō ētahi atu mōhiohio, me whakamahi ko tētahi o ēnei āhuatanga e whai ake:

nzta.govt.nz/teahuaturanga

facebook.com/nztacni

twitter.com/wakakotahicni

0800 740 560

teahuaturanga@nzta.govt.nz