E āta anga whakamua haere ngā mahi i Te Ahu a Tūranga ki te tau tuarua
Kua eke nei ki tōna tau tuarua, kei te anga whakamua ngā mahi i Te Ahu a Tūranga: Te Huarahi Matua o Manawatū-Tararua ahakoa ngā uauatanga i pā mai i te pito o te tau 2021, me te taenga mai o te Omikona ki te rohe.
I hikina e ngā kaimahi kari whenua ngā mahi mō te toru wiki i te Tīhema nā te karawhiuwhiu o te ua i Te Papaioea engari ka nui ngā mahi kua oti i a rātau me ētahi rā mahi i eke ki taumata kē atu, arā, ko te neke i te 100,00 oneone mita pūtoru i te wiki kotahi, ā, me te neke atu i te 20,000 mita pūtoru i te rā kotahi.
Neke atu i te 2,000,000 oneone mita pūtoru kua nekehia i tēnei wā, ā, kei te ara tika rātau ki te neke i te hāwhe o ngā oneone katoa o tēnei kaupapa mahi i tēnei tau. Kua riro mai he mīhini-kari 90T ki ngā mīhini mahi, ā, kotahi anake te wāhi o ngā wāhi karikari kāore he kōwani.
I te taha rāwhiti o te huarahi, ka kitea e te iwi whānui te Tapahi 30 kua oti me te Whakakī 21 kua āhua oti haere mai i te huarahi matua i Woodville. I runga ake o te hiwi, kua tīmataria te Tapahi 28, ā, ka kitea ngā mīhini i te huapae e heriheri ana i te 1.2M mita pūtoru o ngā paruparu tuatahi ki raro i te hiwi ki Whakakī 20. Ina oti, he tata ki te 50 mita te hōhonu o tēnei tapahi. Kua whakawāteahia ngā rākau paina mai i tēnei takiwā, ā, kua karia mai he puna horoi pūmau hei putunga wai mō te wā poto mō ngā wai hangatanga.
He nui tonu ngā mahi hangatanga ka kitea mai i te tūnga waka wā poto kei te kuhunga ki te Manawatū Gorge Walk. I te Piriti o Parahaki, kua oti te wiri poutoka mō te tuatahi o ngā poutoko e toru o te piriti, ā, kei te hangaia he pātū maioro mō te poutoko tuatoru ki te taha KiwiRail o te Awa o Manawatū.
I te taha o te wāhi o te Piriti Eco, kua tīmata ngā mahi mō tētahi huanui - he maioro i hangaia pūkahatia kia takoto mai ai he papa wakahiki roa tonu. Kua wiria ngā wiri, ā, kua uru te rua tuku wai tuatahi o ngā mea e waru. E whakamahia ana ngā rua tuku wai hei āwhina ki te whakahaere i te pēhanga wai kaha o raro.
Kua tata te oti o ngā ara kuhunga mai i te Rori o Saddle ki te takiwā mahi, ā, ka māmā ake mō ngā mīhini mahi te uru ki te wāhi o te Piriti Eco me ngā tapahi me ngā whakakī nui rawa o te kaupapa mahi.
Mō te taha ki te whakarākei whenua, e toru ngā pāmu ka whakatōkia ki te tipu i tēnei tau, ā, neke atu i te 600,000 ngā tipu māori kei te ngakia. Kei te haere tonu ngā mahi patu kīrea me ngā tarutaru i roto i ō mātau wāhi whakatautika rauropi onāianei.
Kua tata te kī o te ohu mahi mō te tau, ā, tata ki te 250 ngā tāngata kei reira. 40 ngā pakihi o te rohe kua whiwhi mahi i te kaupapa, ā, kua riro i a rātau ngā ratonga tauwhāiti, pērā i te tapahi raima, tope paina, tīrewa, whakahaere ikiiki, patu kīrea me te maha atu.
Pērā anō i te motu whānui, kei te whakapau tēnei kaupapa kia noho haumaru ngā tāngata i roto i te urutā KOWHEORI-19. Kua roa e mau ana ngā whakaritenga hauora me te haumaru pākaha, heoi, ahakoa ngā mahere papai me te tino tūpato a ngā kaimahi, i pāngia ētahi e te mate KOWHEORI-19 i te wāhi mahi i nā tata nei. Ko te hunga i pāngia i whai tonu i ngā tikanga taratahi me te whakamātautau tōtika me te tautoko i te Rōpū Oranga o te kaupapa.
I te noho takatū tonu mātau mō te pānga mai o te KOWHEORI-19 ki tō mātau rohe me tā mātau kaupapa mahi, ā, koinei te wā me tino whakapau kaha mātau kia noho ko te hauora me te oranga o ā mātau kaimahi te mea nui.
Kia kite ai i te rerenga hou rawa me ngā kōrero mai i te Kaiwhakahaere Hangatanga, haere ki www.nzta.govt.nz/projects/te-ahu-a-turanga/
|