Te Pirimia a Jacinda Ardern i te taha o ngā tamariki kura i tā mātau kaupapa te Huripoki i te Oneone me te Whakatō Tipu.

Kua tīmata tonu!

Kua tau ngā whakaaetanga rawa, kua oti tonu te hoahoa, ā, kua reri mātau ki te tīmata i ngā mahi hanga i Te Ahu a Turanga: Te Huarahi Matua o Manawatū-Tararua ā tērā marama.

Me mātaki i tā mātau ataata hakori ‘He pēhea te hanga i te huanui hou’ kia mōhio ai ki ngā wāhanga e whā o te kaupapa hanga, ko te otinga atu ko te whakatuwheratanga o te rori ā te Tīhema 2024!

Kua whakahoutia hoki e mātau tā mātau paetukutuku kaupapa mahi inā tata nei mā ngā mōhiohio nui mō tēnei kaupapa hira ā-motu, i tīmata mai i te katinga i te 2017 o te rori tawhito o Manawatū Gorge, i roto i ngā whakawhitiwhiti kōrero, te whiwhi whakaaetanga rawa me te hoahoa, tae noa mai ki tēnei rā me te tīmatanga o te huarahi matua me te hanganga ara whakamahinga tuari tahi.

I tēnei marama i tae mai te Pirimia a Jacinda Ardern rāua ko te Minita Ikiiki a Michael Wood ki te whakanui i te Huripoki i te Oneone me te Whakatō Tipu i Woodville.

Kāore i ua (engari i kaha te pupuhi o te hau!), ā, ka huripokia e ngā rangatira ngā oneone tuatahi e tohu ana i te tīmatanga o ngā mahi.

Neke atu i te 200 ngā tāngata o te hapori, ngā hoa pātui ā-iwi me ngā tamariki kura i tae mai, ā, nā te Pirimia i ārahi i te whakatōnga o ngā tipu me ngā rākau rua miriona tuatahi ka whakaurua e mātau ki te whenua i roto i te kaupapa hira tiaki taiao o tēnei kaupapa.

Ka tīmata ngā mahi i te pūtahitanga o ngā Rori o Cook me Saddle hei te waenganui o Hānuere.

Te whakahou i te Rori o Cook

Ko te Rori o Cook tētahi o ngā kuhunga matua ki te wāhi hangatanga o te huarahi matua o Te Ahu a Turanga, ā, ka whakahoutia i roto i tēnei kaupapa. Kua whakaaetia kia tīmata tēnei mahi ā te tau hou.

Kei roto i ngā mahi i te Rori o Cook ko ngā wāhi whakahipa waka me ngā wāhi huri mauī me te matau kei te pūtahitanga o ngā Rori o Cook me Saddle, hei āwhina i te nui haere o ngā waka i te wā o ngā mahi i te huarahi matua. Ka tīmata mātau i ngā mahi mō te pūtahitanga i waenga o te Hānuere, ā, ko te tūmanako he rua wiki te roa ka oti.

Me kati te ara hipa kei te Rori o Saddle e pātata ana ki te pūtahitanga o te Rori o Cook i ētahi wā i te wā e mahia ana ngā mahi me te peita i ngā rārangi rori hou. Ka pūmau te kati o te ara ā te Pepuere i te otinga o te pūtahitanga. Ka haere tonu ngā mahi i te Rori o Cook, he āhua kotahi marama te roa.

Ka whakamaua ngā pānui ki te Rori o Saddle hei whakamōhio atu i ngā kaitaraiwa mō te nui haere o ngā waka e puta mai ana i te Rori o Cook.

Ko ngā kainoho anake ka āhei atu ki te Rori o Cook kia mutu rā anō te huarahi matua hei te Tīhema 2024.

Kei te koki 90° o te Rori o Hope ko tētahi pūtahitanga tautuku e tīmataria ai ngā mahi hangatanga.

Te whakahou i te Rori o Hope

Ko te Rori o Hope tētahi o ngā kuhunga matua ki te wāhi hangatanga o te huarahi, ā, pērā anō i te Rori o Cook, ka whakahoutia tēnei i roto i tēnei kaupapa.

Kei roto i ngā mahi i te Rori o Hope ko te whakawhānui ake i te paetaha me ngā māka rārangi hou ki te pūtahitanga me te Rori o Woodlands, tae noa ki te whakarārangi anō i te koki 90° o te Rori o Hope hei hanga i tētahi pūtahitanga tautuku ki te kuhunga ki te wāhi ka tīmata ngā mahi hangatanga.

E hiahiatia ana ēnei mahinga whakapai ake i te haumaru hei āwhina i te nui haere o ngā waka i te wā o te hangatanga, ā, kia pai ai te huri o ngā waka utanga.

Ko te tūmanako he toru te roa ka oti ngā mahi, ā, ka tīmata hei te waenganui ki te mutunga o te Hānuere.

Ka whai pānga te Rori o Woodlands nā te katinga o te paetaha mō te roanga o ngā mahi whakahou i te pūtahitanga. Kei roto anō i tēnei ko tētahi ara kotahi, me ngā whakahaere tū/haere, mō ētahi mahi whakawhānui i te paetaha, te māka i te rori me te tāhira. He tata ki te kotahi wiki te roa o tēnei.

Kāore i whakaritea he mahi mō te pūtahitanga o te Rori o Saddle me te Rori o Hope.

Ara urunga mai i te Rori o Saddle

Kei te hangaia e mātau he ara kuhunga mai i te Rori o Saddle, i Ashhurst. Ka hipa tēnei i raro i te piriti o Pohangina kia tae atu ki ngā wāhi hangatanga mō ngā piriti matua e rua o te kaupapa.

Ko te huringa ki tēnei ara kei tērā taha o te piriti o Pohangina i a koe ka puta mai i Ashhurst.

Kia mātua haumaru ai, kua katia te kuhunga tūmatanui mai i tēnei wāhi ki te awa.

Ētahi atu kōrero

Mō ētahi atu mōhiohio, me whakamahi ko tētahi o ēnei āhuatanga e whai ake:

nzta.govt.nz/teahuaturanga

facebook.com/nztacni

twitter.com/wakakotahicni

0800 740 560

teahuaturanga@nzta.govt.nz