|
Kei te ara tika te huarahi matua whai muri i ngā mahinga nui o te tau tuatahi o ngā mahi hangatanga
Kua tae atu te kaupapa ki te 12 marama o ngā mahi hangatanga o Te Ahu a Tūranga: Te Huarahi Matua o Manawatū-Tararua, ā, he wā pai tēnei ki te whakaaroaro mō ngā tohu nui i taea i roto i te tau tuatahi.
He nui ngā whakapātaritari i pā mai i te tau 2021, engari ahakoa tēnei, he rawe tonu te anga whakamua a te rōpū, ā, kei te tika te haere o ngā mahi.
Mai i te Hānuere ki te Oketopa, neke atu i te 650,000 mita pūrua ngā oneone i nekehia. Kua neke kē atu taua tatau ināianei ki te 1,000,000 mita pūrua ināianei, ā, me te mita pūrua miriona i nekehia i te 19 o Noema. Kua uru atu mātau ināianei ki te wāhanga tau tuarua o ngā mahi kari whenua, ā, ka tino whai hua tō mātau rōpū i te huarere mahana ake, maroke ake e tino nui ai ngā oneone ka taea te neke.
E pai ana te haere o ngā mahi ki ngā piriti me ngā arararo o te rori. Ko ngā poutoko tuatahi kua whakaurua ki te Piriti o Parahaki, ki te awa o Manawatū, ā, he tohu nui rawe tēnei. Ka haere tonu ngā mahi i te pātū kei te toe i te Arararo o te Pāmu Nutcracker e tata ana ki te huarahi matua pātata ki Ashhurst. I te taha ki Woodville o ngā mahi, kua putua atu te raima o te Arararo o Morgan, ā, nā ka taea te karawata i te taha te hanga.
Neke atu i te 250,000 ngā tipu māori i rumakina e ō mātau rōpū mahi whenua i ngā wāhi e rua i tēnei tau, i raro i te kaupapa whakatipu hei whakatautika i te āhuatanga rauropi o te kaupapa. Kua tīmata ngā mahi tiaki i ēnei tipu, ā, ka haere tonu mō ngā tau e rima nei. Kua tīmata ngā mahi kia takatū ai mō te tau 2022, ā, neke atu i te 600,000 ngā tipu hei whakatipu i ngā wāhi whakatautika e toru.
Mēnā kei te hiahia koe ki te kite i ā mātau mahi, ka whakarere mātau i tā mātau matatopa hei whakaahua i ā mātau i te rori. Ka kitea ngā ataata hōu rawa i tā mātau paetukutuku:
nzta.govt.nz/projects/te-ahu-a-turanga/
Tae noa ki te Tīhema, neke atu i te 220 ngā tāngata kei te mahi i roto i tēnei kaupapa mahi, ā, ka hiahia tonu mātau i ngā tāngata whai i ngā tūmomo pukenga hei whakauru mai ki ngā mahi. Hei tiro i ngā mahi hōu rawa, me haere ki:
nzta.govt.nz/projects/te-ahu-a-turanga/jobs/
Kei te pā tonu mai ngā uauatanga o te KOWHEORI-19, he pērā mō ngā rāngai katoa, heoi kei te mahi mātau i raro i ngā tikanga pākaha kia tino haumaru ai ā mātau kaimahi, ā, kia anga whakamua ai ngā mahi. Kei roto i ēnei tikanga ko te mau ārai kanohi mō ngā whakapāpā tata katoa, te whakamahi i te taupānga NZ COVID Tracer, me tā mātau taupānga Who's On Location. Kua whakatūria e mātau ngā Wātene Māori o Raukawa ki ngā kuhunga hei tirotiro i ngā nekenekehanga katoa i te rori.
He nui ngā mahi i oti i te whānau o Te Ahu a Tūranga, ā, ka whakatā rātau mai i te 23 o Tīhema, ā, ka tīmata anō ngā mahi hei te tīmatanga o te Hānuere. Koinei te pānui whakamutunga mō te tau, ā, ka whakamōhio haere anō mātau i a koe hei te tau hou. Tēnei te tuku mihi a te whānau o Te Ahu a Tūranga ki a koutou katoa, meri kirihimete, ā, kia haumaru ā koutou hararei.
Ko ngā whakaahua kei raro iho, mai te pito: Ngā mahi kari whenua i Karinga 13, i te taha o te Meridan Access Track, i te Rohe 2; He nui ngā mahi a te rōpū mahi whenua i ngā wāhi pāmu pātata nō te kaupapa whakatautika āhuatanga rauropi a Te Ahu a Turanga; He tirohanga mai i runga o te pāpani wai i te wāhi mahi o te Piriti o Parahaki.
|
|