Umhverfisverðlaun atvinnulífsins 2025

Umhverfisverðlaun atvinnulífsins 2025 voru afhent á fjölmennum Umhverfisdegi atvinnulífsins, sem haldinn var í tíunda sinn. Verðlaunin eru veitt fyrirtækjum sem skara fram úr í umhverfis- og loftslagsmálum og sýna í verki hvernig árangur næst með markvissum aðgerðum, nýsköpun og ábyrgri stjórnun.

Umhverfisfyrirtæki ársins er Heimar og SnerpaPower hlaut verðlaunin Umhverfisframtak ársins. Jáverk og Krónan hlutu sérstakar viðurkenningar

Umhverfisdagur atvinnulífsins er sameiginlegt verkefni SA, SI, SVÞ, SAF, SFS, SFF og Samorku.

Íslenskur sjávarútvegur í ólgusjó - Sjávarútvegsdagurinn er á morgun

Sjávarútvegsdagurinnverður haldinn á morgun 25. nóvember í Norðurljósasal, Hörpu. Sjávarútvegsdagurinn er haldinn í samstarfi Deloitte, Samtaka fyrirtækja í sjávarútvegi og Samtaka atvinnulífsins.

Hanna Katrín Friðriksson, atvinnuvegaráðherra, opnar fundinn og erindi verða frá Gunnþóri Ingvasyni, formanni SFS og forstjóra Síldarvinnslunnar, Daníel Jakobssyni, forstjóra Arctic Fish, og Jónasi Gesti Jónassyni hjá Deloitte. Kristín Auður Viðarsdóttir, framkvæmdastjóri IS Haf fjárfestinga stjórnar fundinum.

Fundur hefst með léttum morgunverði kl. 8:00 og dagskrá erinda er frá 8:30-10:00.

Innri markaðurinn var ræddur á formannafundi BusinessEurope

BusinessEurope undirstrikaði á formannafundi á Kýpur að sterkari, skilvirkari og dýpri innri markaður sé forsenda þess að Evrópa nái markmiðum sínum varðandi samkeppnishæfni, öryggi, loftslagsbreytingar og þróun gervigreindar.

„Málflutningur heildarsamtaka evrópsks atvinnulífs er samhljóma málflutningi þess íslenska. Kröfum almennings um aukin lífsgæði og kröfum stjórnvalda í loftslagsmálum verður ekki mætt nema stjórnvöld losi um þá spennitreyju sem atvinnulífið er í vegna stjórnsýslulegra hindrana, blýhúðunar reglugerða og hárra skatta. Atvinnulífið er lausnin, ekki vandamálið,“ segir Jón Ólafur Halldórsson, formaður SA.

Grænir skattar og loftslagsmál rædd á Sprengisandi

Anna Hrefna Ingimundardóttir, aðstoðarframkvæmdastjóri SA, ræddi græna skatta og efnahagsmál á Sprengisandi á Bylgjunni ásamt Guðmundi Inga Guðbrandssyni, fyrrverandi umhverfisráðherra.

Farið yfir stóra sviðið í Þjóðmálum

Sigríður Margrét, framkvæmdastjóri SA, var í ítarlegu viðtali hjá Gísla Frey Valdórssyni í Þjóðmálum í síðustu viku. Sigríður Margrét kom víða við og ræddi meðal annars vinnumarkaðsmódelið, stöðu hagkerfisins, öryrkjagildru og tengingu almannatrygginga við launavísitölu.

Ákvörðun peningastefnunefndar ekki komin til af góðu

„Það má alla vega segja að þessi vaxtalækkun sé ekki komin til af góðu,“ sagði Anna Hrefna, aðstoðarframkvæmdastjóri SA og forstöðumaður efnahagssviðs samtakanna , í samtali við Morgunblaðið í tilefni af ákvörðun peningastefnunefndar Seðlabanka Íslands.

Vel heppnaður ársfundur Fræðslumiðstöðvar atvinnulífsins

Vel heppnaður ársfundur Fræðslumiðstöðvar atvinnulífsins (FA) fór fram 13. nóvember s.l. þar sem rúmlega 240 manns tóku þátt á staðnum og í streymi. Aðalfyrirlesari dagsins, Olga Orrit, fjallaði um þá samræmdu aðferðafræði sem beitt er í umönnunargeiranum í Svíþjóð hvað varðar umgjörð tungumálafulltrúa á vinnustað, en FA vinnur að því að byggja upp sambærilega umgjörð hér á landi.

Skattasnjóhengjan yfirvofandi

Í grein sem birtist fyrst í Viðskiptamogganum í síðustu viku skrifar Ísak Einar Rúnarsson, forstöðumaður málefnasviðs SA: „Lýðfræðilegar breytingar eru í deiglunni þessa dagana. Einna helst er tekist á um fjölgun innflytjenda næstu árin og áratugina. En það er annar og ekki síður mikilvægur vinkill á fyrirséðum breytingum á samsetningu þjóðarinnar sem hefur minna verið til umræðu – öldrun hennar.“

Af hverju þarf Samkeppniseftirlitið að komast heim til mín?

„Það verður seint sagt að eftirlit með íslenskri samkeppnislöggjöf skorti eða að tilefni sé til að auka við slíkt eftirlit. Að þörf sé á að þyngja enn frekar regluverk sem nú þegar er þungt í vöfum og færa Samkeppniseftirlitinu nýjar valdheimildir sem það hefur ekki í dag,“ skrifar Lilja Hrund Lúðvíksdóttir, lögfræðingur á málefnasviði SA í grein sem birtist fyrst í Viðskiptablaðinu.

Öflugur útflutningur - Aukin lífsgæði

Skýrslan Öflugur útflutningur - Aukin lífsgæði er nú aðgengilega á vef SA. Var skýrslan gefin út í tengslum við Ársfund atvinnulífsins sem haldinn var í Hörpu 2. október síðastliðinn. Útgáfan er ríflega 150 síður og gefur mikilvæga innsýn í stöðu útflutnings og mikilvægis hans fyrir samfélagið í fortíð, nútíð og þá ekki síst framtíð.

Við erum alltaf á vaktinni

Samtök atvinnulífsins vinna markvisst að hagsmunagæslu í þágu atvinnulífsins og því að tryggja íslensku atvinnulífi samkeppnishæf starfsskilyrði - landsmönnum öllum til hagsbóta. Mikilvægur liður í þeirri vinnu er að vakta þingmál er varða félagsmenn og atvinnulífið í heild og berst SA jafnframt mikill fjöldi þingmála til umsagnar.

Síðustu umsagnir SA má lesa á heimasíðu SA.

Gott að vita