Ngā Pitopito Kōrero

14 Hiringa-ā-nuku 2022

Tēnā koutou, ā, nau mai anō ki ngā whakamārama mō Te Huarahi Matua o Manawatū-Tararua – te ara 11.5km te roa hei hono anō i a Manawatū, te Takiwā o Tararua, Te Matau-a-Māui me te raki o Te Wairarapa, e whakakapi ana i te Huanui Matua 3 o Te Āpiti o Manawatū kua kati nei.

Kua mau te Poutoko 1 o te Piriti o Parahaki, kei te parenga o te awa o Manawatū, ki te whenua.

Ka pai te anga whakamua o ngā mahi i te huarahi matua i ngā marama o te takurua

Te Ahu a Turanga: Kei te eke tonu ngā rōpū hanganga, ngā mahi kari whenua me te horanuku ki ngā tohu nui hira i roto i ngā āhuatanga kino a Tāwhirimātea i te takurua.

Ngā hanganga
Kua oti ngā poutoka hei whakatau i te tūāpapa o te Piriti o Parahaki, e whakawhiti ana i te awa o Manawatū, ā, i putua te poutoko whakamutunga i te poutoka 3 i waenganui o te Hūrae. I tīmata ngā mahi poutoko i te Ākuhata o tērā tau, ā, nā te whakapau kaha o te rōpū mahi i reira i oti ai te mahi i mua o te wā i whakaritea. Kei te haere ngā mahi putu raima me te whakamau maitai hei hanga i ngā pou ki ngā poutoka e toru o te piriti.

Kei te haere tonu ngā mahi poutoka i te awa i te wāhi mahi o te Eco-Viaduct, ā, 12 o ngā poutoka 16 kua oti i te Hepetema 2022. Kei mua noa atu ngā mahi e haere ana i te arararo o te Pāmu Hau o Te Āpiti, ā, kei te whakarite mahere mō te tīmatanga o te hanga i te Piriti o Mangamanaia i te taha o Woodville o te huarahi matua i te raumati. Kua oti ngā hanganga o ngā arararo o te Pāmu o Nutcracker me te Rori o Morgan.

Ngā Mahi Kari Whenua
Ka rawe kē te anga whakamua o ngā mahi kari whenua, kei te takiwā o te 3.7 miriona mita pūtoru te oneone kua nekehia i te tīmatanga o ngā mahi hangahanga i te 2021.

I tutuki anō i te rōpū te tohu nui tino rawe o te whāinga mahi karinga o te 2.8 miriona mita pūtoru. E tūmanako ana rātau ka tutuki i a rātau te rahinga karinga whenua o te kaupapa o te 6 miriona mita pūtoru i te wāhanga raumati tuarua, ka tīmata i te Oketopa 2022, ā, ka mutu hei te 2023.

I te taha rāwhiti o te kaupapa, ko te tikanga ka tīmata ngā mahi i te takāwhio e pātata ana ki te whakawhitinga o te Ropi o Woodlands me te Huarahi Matua 3 i te pito o Hepetema. Ka tīmata ō mātau rōpū mā te whakauru mai i ngā whakahaere ā-taiao, whai muri mai ko ngā karawata nui me te neke i ētahi atu ratonga whaipainga. Ko te tikanga ka oti ēnei hei te Hānuere 2023, ā, i muri mai ka tīmata ngā mahi kari whenua.

Horanuku
I te Hepetema, i eke ngā rōpū horanuku ki te wāhanga 400,000 mō ngā tipu i rō whenua i ngā wāhi whakatipu e toru o te kaupapa. Nō reira ka taea tonu e te rōpū te whakatutuki tā rātau whāinga whakatipu o tēnei tau o te whakatipu tipu neke atu i te 500,000 hei te Mutunga Wiki Labour. I roto i te roanga atu o te kaupapa, ko te tūmanako tata ki te 1.8 miriona ngā tipu māori ka whakatipuria.

E rua ngā wāhi whakatautika kei te whakatipuria e ngā rōpū ā-iwi; ko Rangitāne o Manawatū me Ngāti Kahungunu. Kua tīmata anō te rōpū Ngā Pūkenga Mahi Hapori i ngā mahi whakatipu harakeke i te Moutere o Parahaki, me ngā tautoko mai i ngā rōpū horanuku me te kaupapa.

Kei te aromatawai tonu ngā kaiārahi o te kaupapa i te pānga haere tonu o ngā marangai, ngā whakapātaritari mahi pūhanga me te KOWHEORI-19 ki ngā mahi, ā, kia whaihua i ia whai wāhitanga hei whakangāwari i ngā whakararutanga me te whakaiti i ngā tōmuritanga ka pā mai. I tēnei wāhanga, kei te whakapau kaha tonu mātau kia oti te kaupapa hei te marama o Tīhema 2024.

Kia kite ai i ngā whakaaturanga arorangi, haere ki te whārangi kaupapa kei te paetukutuku a Waka Kotahi: www.nzta.govt.nz/projects/te-ahu-a-turanga/

Ngā pikitia i raro: Ngā kaimahi o te rōpū horanuku e mahi ana i tētahi o ngā wāhi whakatipu o te kaupapa.

Kei te pai te haere o ngā mahi karikari i te Whakakī 13 i te Rohe 2 o te wāhi hangatanga o Te Ahu a Turanga.

Mai i te taha mauī: Nō te iwi o Rangitāne o Tamaki nui-ā-Rua a Joanne Heperi, Manahi Paewai, Ataneta Paewai, Lucretia Mason, Ngatiria Reweti (pāhake), Richard Boyd (i muri), Hineirirangi Carberry, Mavis Mullins, Peter Holm, Lorraine Stephenson me Kuini Hoera.

I kite ā-kanohi ngā hoa kaupapa ā-iwi ki te wāhi mahi

I haere ake he tira nō te hoa kaupapa ā-iwi, a Rangitāne o Tāmaki nui-a-Rua, ki te wāhi mahi o Te Ahu a Turanga: Te Huarahi Matua o Manawatū-Tararua i te Ākuhata ki te tūtaki i te rōpū me te kite ā-kanohi i te haere o ngā mahi.

Ahakoa kua tae kē atu ngā tāngata o te iwi ki te wāhi mahi i mua, koinei te wā tuatahi i tae atu he tira nui mai i te tīmatanga o ngā mahi. I whai wāhi atu rātau i tēnei haerenga ki te kite ā-kanohi i te anga whakamua me te āhei atu ki te kōrero ki ngā tino tāngata o te rōpū Hononga.

Nā te kaimahi o te Hononga a Joanne Heperi, me te Kaitiaki a Peter Holm me Kuini Hoera o Rangitāne o Tamaki nui-ā-Rua rātau i manaaki. I tēnei haerenga i haere rātau ki ngā wāhi hangatanga hira, me ngā rohe 2, 2.5 me te 3 me te wāhi mahi o te Piriti o Parahaki.

Whai muri i te tirotiro i te wāhi mahi, i tū he wānanga i te tari o te kaupapa, Te Whare Pūmanawa, i reira ka kōrero te iwi mō te anga whakamua, ngā kaupapa me ngā tūmanako mō te pātuitanga ki ngā kaimahi a Te Pūtahi Māori me te Rōpū Kaiārahi o te Hononga.

I kī te Kaiārahi o te Kaupapa a Tania Riwai, te kaiārahi i te rōpū Te Pūtahi, he wā hira tēnei ka tae atu ngā hoa ā-iwi o te kaupapa ki te wāhi mahi.

"Kei konei ngā māngai o ngā hoa ā-iwi o te kaupapa, tae atu hoki ki a Rangitāne o Tamaki nui-a-Rua. Ka rawe kē ngā tāngata o Rangitāne o Tamaki nui-ā-Rua kei te mahi i Te Ahu a Turanga hei kaitiaki i te mahi maunga, ngā awa me te whenua, ā, i rekareka katoa ki a rātau te whakaatu ki tō rātau iwi ā rātau mahi."

I te taha o Rangitāne o Tamaki nui-ā-Rua, kei te mahi tahi hei hoa pātui a Te Ahu a Turanga me ētahi atu iwi e toru o te rohe: Rangitāne o Manawatū, Ngāti Kahungunu ki Tāmaki nui-a-Rua me Te Rūnanga o Raukawa (Ngāti Raukawa ki te Tonga me Ngā Kaitiaki o Ngāti Kauwhata).

Koinei te wā tuatahi kua pēnei te mahi ngātahi tētahi kaupapa hangatanga matua me ngā iwi, ā, e kitea ana te iwi i ngā taumata katoa o te kaupapa, tae atu ki te Poari Hononga o te Kaupapa, Ngā Kaiārahi o te Kaupapa me ngā rōpū whānui o te wāhi mahi.

Mai i te Hepetema, ka tū Ngā Kōrero Hira a Ngā Iwi, ā, ka tae atu ngā hoa ā-iwi katoa o te kaupapa ki Te Ahu a Turanga. I ēnei hui ka kōrero ngā iwi i ā rātau tino kōrero tuku iho, ā, e tuwhera ana rātau ki te kōrero ki te rōpū Hononga.

I kī a Tania Riwai ka tino kite ngā kaimahi o te Hononga mai i te hui nei me te mārama ki te hoa ā-iwi o te kaupapa me te whakarite tonu ka rongohia tonu ō rātau reo

I mahi a Sapper Jared Greenfield, Sapper Ryan Hay me Sapper Kieran Cropp i te kaupapa nā te pātuitanga. WHAKAAHUA: NZDF

Ka whakauru mai ngā kaipūkaha o Te Ope Kātua o Aotearoa ki ngā rōpū kari whenua

Kei te whiwhi ngā pūkenga o Ngāti Tūmatauenga i ngā pūkenga pūkaha tino hou rawa mā te whakauru mai ki ngā mahi hangatanga o Te rōpū Te Ahu a Turanga: Te Huarahi Matua o Manawatū-Tararua.

Nā te pātuitanga i waenga i a Ngāti Tūmatauenga me te Hononga o Te Ahu a Turanga: Te Huarahi Matua o Manawatū-Tararua i whai wāhi mai ai ngā hōia ki ngā mahi hangatanga o te rori hou.

I kī te Ngārahu o te Ope Rangapū Pūkaha 2 Matua Tautoko Kaipūkaha 25 a Rūtene Blair Jones ka whai hua ngā hōia i te kaupapa i te mea kāore e whai wāhi atu rātau ki ēnei mahi pēnei rawa te nunui i a ia rā.

"Ka nui atu ngā mōhio ka whiwhi i ā mātau hōia mō ngā āhuatanga o tētahi kaupapa tūāhanga pēnei rawa te nui. Ka ako anō rātau ki te whakamahi i ngā utauta hou ake me ngā mea hou e whakamahi ana i ngā pūnaha whai haere GPS mō te whai haere i te neke a ngā mīhini, te hōhonu o ngā karinga me ngā rohenga."

I kī ia i tuku wheako mahi te kaupapa e taea ai e ngā kaiwhakahaere mīhini te whiwhi taunakitanga whaikiko me te whakatūturu i ngā mōhiotanga, ā, ka taea pea te whakamahi hei whakaoti i te maha o Ngā Tiwhikete Hangatanga ā-Motu.

I whai wāhi atu anō ngā hōia ki ngā tohunga o ngā kaupapa ahumahi, ā, i makere noa ō rātau mōhio ki a rātau.

"E rua, e toru pea ngā hōia kei te wāhi mahi mō ia ono wiki, ā, ka pērā haere mō te roanga atu o te kaupapa" te kī a Rūtene Jones.

I kī te Kaiwhakahaere o te Kaupapa o Te Ahu a Turanga a Tony Adams he wāhanga hira ngā hōia e mahi ana i te wāhi mahi nō te rōpū kari whenua.

"He ngaio tino matatau ēnei hōia, nō reira kei te whakamahia e mātau ā rātau whakangungu, wheako hoki mō te painga o te hanga i te huarahi matua. 18 ngā hōia kua whakaurua mai e mātau i tēnei wā, ā, kei te rikarika katoa mātau ki te kite i ā rātau mahi tautoko i tēnei wāhanga hira o te hanganga."

I kī te Kaiwhakahaere Takawaenga ā-Iwi o Waka Kotahi o te kaupapa a Grant Kauri, he tauira anō te whakaurunga mai o ngā hōia ki te tino hira o te pātuitanga me te mahi tahi ki te kaupapa.

"He wāhanga hira te pātuitanga ki ngā mea katoa ka mahia e mātau i tēnei kaupapa. I mahi ngātahi mātau me ngā iwi, me ngā kamupene hoahoa me te hanga i te huarahi matua me ngā hapori e pae ana. Kua roa a Ngāti Tūmatauenga e tautoko ana i ngā tāngata me ngā hapori, nō reira e hiamo ana mātau kua uru mai ā rātau kaimahi ki tēnei kaupapa."

Hei whakanui i te pātuitanga, i waitohua he whakaaturanga whakatau e Ngāti Tūmatauenga me Fulton Hogan (mō te taha ki te Hononga o Te Ahu a Turanga) i te Āperira o tēnei tau.

I whai wheako whānui nui tētahi rōpū pia taiohi nō Te Pūkenga i te wāhi mahi o Te Ahu a Turanga, pērā i te ako mai i te rōpū hanganga e hanga ana i te Piriti o Parahaki i te awa o Manawatū.

I whakaaetia ngā pia o Te Pūkenga mai i te wā i a rātau i te wāhi mahi

I whiwhi tirohanga hira tētahi rōpū ākonga kura tuarua i kaingākau ki te aramahi hanganga ki te āhua o te mahi i tētahi o ngā kaupapa huarahi matua nui rawa o Aotearoa.

Kua oti i ngā taiohi e ono tētahi kaupapa pia i te kaupapa o Te Ahu a Turanga: Te Huarahi Matua o Manawatū-Tararua, he wāhanga nō te Tiwhikete o Aotearoa mō Ngā Mahi Tūāhanga, Taumata 2, kei te whakaotihia e rātau i raro i Te Pūkenga.

E rua ngā haere atu a ngā pia i te wiki ki te wāhi mahi mai i te Āperira kia whai wāhi atu ki ngā tūmomo mahi. He mea whakarite ēnei haerenga atu kia whiwhi wheako whaitake ai mō tētahi kaupapa hangatanga i a rātau e whakaoti ana i te tiwhikete.

I ēnei haerenga, i haere ngā pia i runga i ngā taraka putu nunui i te taha o ngā rōpū kari whenua, i āwhina i ngā kaimahi horanuku ki te whakatipu, i arotake i ngā whakamātautau i te taiwhanga i te wāhi mahi, i whiwhi mōhio mō te horopaki tikanga me te ahurea o te kaupapa i te taha o ngā kaitiaki, ā, i tirotiro i ngā puna parahua me te rōpū taiao.

I te taha o te wheako mahi, i whakahaerehia e ngā kaimahi o te kaupapa ngā wāhanga hei whakapakari i ō rātau pūkenga matua, pērā i te mōhio ā-pūtea, te whakawhitiwhiti kōrero me te mahi tahi.

I kī tētahi o ngā pia, a Elaine Wilman, nā te kaupapa i whai wāhi atu ia ki ngā āhuatanga maha o te hanga huarahi mahi.

"Arā noa atu ki tāku i tūmanako ai. I pōhēhē ahau he noho noa iho, me tētahi rākau ārahi waka ka hurihuri noa."

He wāhanga te kaupapa pia nō te pātuitanga i waenga i a Te Pūkenga me te Hononga kia whai wāhi atu ngā ākonga me ngā kaimahi mai i ngā whakahaere e rua ki ngā pūkenga, ngā whakangungu me ngā mōhio hei painga mō rātau, ō rātau whānau, te hapori me te rāngai hangatanga whānui.

E mahi ana ngā whakahaere mai i te tau 2020, ā, i waitohua he Tauākī Whakamaunga Atu e whakarārangi i te pātuitanga i te tau 2021.

I kī te Kaiwhakahaere Takawaenga ā-Iwi a Waka Kotahi a Grant Kauri he tino tauira ngā pia o te koronga o te kaupapa ki te whakarato i ngā putanga hapori pūmau.

"Kei runga atu tēnei kaupapa i te hanga i tētahi huarahi matua noa iho. Kei te hiahia mātau ki te whakarato i ngā whakangungu, ngā tautoko me ngā mōhio ki ngā tāngata o tēnei rohe e hiahia ana ki te whai mahi i roto i ngā mahi hanganga me te hangatanga me te tūmanako ka whakamahia aua pūkenga puta noa i te rohe ina wehe mātau.

"Mā te tuku wheako ki ēnei pia i tō mātau wāhi mahi, ko te hiahia uru te hiahia ki a rātau ki te whai mahi i roto i te rāngai hangahanga me te hanganga. Engari me tō mātau hiahia anō kia kite rātau ehara ēnei mahi ko ngā mīhini kari whenua, mīhini nunui hoki, i te mea kei roto i ēnei kaupapa ko ngā kaimahi horanuku, ngā kaitohutohu tikanga, ngā kaikaute, ngā tohunga rauropi, ngā kaihoahoa me te maha atu."

Hei tā te Tumuaki Matua Pakihi Ngā Pātuitanga Pakihi me te Ahumahi o Te Pūkenga a Jasmine Groves, ko ngā taiohi e ono kei roto i te U-Skills Trade Academy a Te Pūkenga.

"Mā te U-Skills ka taea e ngā taiohi te noho tonu i te kura, me te whai tohu mātauranga tuatoru hei whakauru ki te ahumahi ina mutu tō rātau kura."

"Nā tō mātau pātuitanga me Te Ahu a Turanga: Te Huarahi Matua o Manawatū-Tararua, i whai wāhi atu ā mātau ākonga ki tētahi whai wāhitanga ahurei kia tū pakari ai rātau mō tō rātau ao i muri i te kura."

I tū he huihuinga hei whakanui i ngā pia, te hunga i haere ki Te Kura Tamatāne o Te Papaioea, Te Kāreti o Tararua me Te Kura ā-Rohe o Taihape, hei whakanui i ngā pia i te wāhi mahi i te 18 o Ākuhata, ā, i reira ka tukuna e Grant Kauri, Jasmine Groves me te Tumuaki o te Kaupapa a Tony Adams i ngā tiwhikete ki a rātau.

Ko te whai a te kaupapa he tuku haere tonu i ngā kaupapa pia, ā, kei te haere tonu ngā kōrero me Te Pūkenga mō ngā whai wāhitanga ā muri ake.

Mō ētahi atu mōhiohio mō te rēhita ki tētahi akoranga i Te Pūkenga, haere ki www.ucol.ac.nz

Hei mātaki ataata mō te pātuitanga i waenga i a Te Ahu a Turanga me Te Pūkenga, me haere ki:  https://nzta.govt.nz/projects/te-ahu-a-turanga/videos/

I raro: Te Ahu a Turanga: Te Kaiwhakahaere Takawaenga ā-Iwi o Te Huarahi Matua o Manawatū-Tararua a Grant Kauri, mauī i muri, me te Tumuaki o te Kaupapa, a Tony Adams, matau i muri, ko (pae o mua mauī ki matau) Elaine Wilman, James Jenkins, Eli Coe, Blake Holden me Israel Bailey me ā rātau tiwhikete i te whakapōtaetanga i tū i te Tāite, 18 o Ākuhata.

Kei te taraiwa a IIliythia George i te mīhini whakataruna Taraiwa i te Huarahi Matua i Te Whare Pukapuka o Ashhurst.

Taraiwahia te huarahi matua i tō whare pukapuka

Ko te hunga e hiahia ana ki te mōhio he pēhea te āhua o te taraiwa i te 11.5km, ara e whā o Te Ahu a Turanga: Te Huarahi Matua o Manawatū-Tararua, kei te tuwhera ki a koutou kia haere mai ki te whakamātautau i tētahi o ngā mīhini whakataruna kua whakaurua mai e te kaupapa puta noa i te rohe.

I whakatūria ngā mīhini whakataruna Taraiwa i te Huarahi Matua hei whakamahi mā te iwi whānui i Te Whare Pukapuka Hapori o Woodville me Te Whare Pukapuka o Ashhurst kia whai wāhi ai te hapori kei ngā taha e rua o te kaupapa ki te tirotiro i te huarahi matua.

Kei te tuwhera Te Whare Pukapuka o Woodville i te Tiriti o Vogel, mai i te 9am ki te 5pm, Mane ki te Paraire (ka hiki mō te tina). E pātata ana te mīhini whakataruna ki te kuhunga matua, a, kei reira anō te papa mōhiohio hei tirotiro me ngā pānui mō te kaupapa tirotiro mā ngā manuhiri.

Kei tua atu ko te Pokapū Mōhiohio, e whakaaturia ana i reira ko ngā ataata arorangi hou rawa o te huarahi matua. E tuwhera ana Te Whare Pukapuka, he mīhini whakataruna anō kei reira, he papa whakaatu me ngā pānui, mai i te 10am ki te 5pm Tūrei ki te Paraire, mai i te 2pm ki te 5pm i te Mane, ā, mai i te 10am ki te 1pm i te Rāhoroi.

Ka āhei anō ngā tāngata ki te haere ki te Pokapū Manuhuri o te Kaupapa mai i te 10am ki 4pm, Mane ki te Paraire (hāunga Ngā Hararei Tūmatanui) ki te taraiwa i tētahi mīhini whakataruna, te pānui i ngā mōhiohio hou rawa me te tiro i te waka o te kaupapa.

Kei te Rori o Napier te pokapū manuhiri, e pātata ana ki te kuhunga ki te tūnga waka o te ara hīkoi o Te Āpiti Manawatū Gorge.

Ētahi atu kōrero

Mō ētahi atu mōhiohio, me whakamahi ko tētahi o ēnei āhuatanga e whai ake:

• nzta.govt.nz/teahuaturanga
• facebook.com/nztacni
• twitter.com/wakakotahicni
• 0800 740 560
• teahuaturanga@nzta.govt.nz