Ngā Pitopito Kōrero

1 Hiringa-ā-nuku 2024

Tēnā koutou, ā, nau mai anō ki ngā whakamārama mō Te Huarahi Matua o Manawatū-Tararua – te ara 11.5km te roa hei hono anō i a Manawatū, te Takiwā o Tararua, Te Matau-a-Māui me te raki o Te Wairarapa, e whakakapi ana i te Huanui Matua 3 o Te Āpiti o Manawatū kua kati nei.

Kua whakatakotoria ngā apa papakū tuatahi i te Whakakī 9 me te Karinga12 o Te Ahu a Turanga.

He mahi hira te papakū tuatahi mō te hanga i te rori

Kua tīmata te hanga i te papa huarahi o te rori Te Ahu a Turanga: Te Huarahi Matua o Manawatū-Tararua me te whakatakoto atu i ngā apa tuatahi o te papakū.

Mai i te tīmatanga o te whakatakoto i te papakū, neke atu i te 6000 tana kua whakatakotohia atu, ko te nuinga ki te taha uru (Ashhurst) o te huarahi matua. 

110,000 tana te nui o te papakū ka whakamahia, arā, 9200 ngā taraka. Ka whakaratoa ngā papakū mai i ngā wheketere papakū e rua; kei Bulls tētahi, ā, kei te wāhi mahi tonu tētahi.

He maha ngā apa o te papa huarahi, ā, huihui katoa he 790mm te mātotoru. 

I muri i te otinga o ngā mahi kari whenua, ka tīmata te hanga i te papa huarahi mā te whakatakoto i te tūāpapa o raro iho, he 350mm te mātotoru o te apa maramara kohatu ka papatautia mā ngā mīhini rōra.

I runga ake i tēnei, ka hangaia te tūāpapa 230mm te mātotoru mā tētahi apa maramara kōhatu kua ranua ki te apaapa hei whakawhena. Kātahi ka utaina atu te kiri rori ki tēnei apa kia waku ai.

He 160mm te mātotoru o te papakū hanganga o te apa whai ake.

He tino kaha tēnei tātai, he ātete i te tewetewe, ka mutu he kaha tonu i ngā rōnaki tūpou. Ka whārikihia atu te apa papakū 50mm whakamutunga o runga kia tata atu ki te tuwheratanga o te rori.

Mā ngā mīhini e hora i te papakū. Ka tīmata mā te taraka, ka putua te papakū ki tētahi mīhini e whai haere tonu i te mīhini.

Ka ōrite te hōrapa a taua mīhini i te papakū i tētahi ara nekeneke i muri, ka whāngai atu ki roto i te rori, ā, he tātari kei roto kia tika ai te hora i te papakū ki te rori ki tōna taumata tika.

Kātahi ka haere tētahi mīhini rōra i runga hei papatau i te papakū.

I ērā atu wāhi o te kaupapa, kei te anga whakamua tonu ngā mahi i ngā hanganga matua, me te taha i tutuki tētahi tohu nui anō i te Piriti o Parahaki, 300 mita te roa, i te awa o Manawatū.

Kua oti i te rōpū mahi te 'tuitui' tuatahi e hono ana i te papa piriti matua i waenga i te Poutoka 1 me te pito taha tōna, te 'pātū pupuri' rānei.

Kua oti te putu i te 26 o te 54 o ngā wāhanga, arā, ko te papa o muri, ko te tikanga ka oti katoa ngā wāhanga hei te mutunga o tēnei tau.

I runga o te awa o te Eco-Viaduct Bridge, e 7 ngā wāhanga o te 11 o te papa o te piriti kua putua.

Ka oti te poutoka whakamutunga i tēnei marama, ā, i muri mai ka putua ngā wāhanga whakamutunga o te papa piriti. Kei te pai te haere o ngā mahi i tēnei piriti a ka oti hei te pito o tēnei tau.

E mahi ana i tētahi o ngā rōpū hanganga ko ngā kaimahi horanuku, ā, neke atu i te 55,000 ngā tipu kua whakatōngia e rātau mai i te tīmatanga o te wāhanga tau i te Āperira.

I tēnei tau ko te whāinga kia 560,000 ngā tipu ka whakatōngia, ā, huihui katoa 1.8 miriona ngā tipu o te kaupapa.

Ko te tikanga ka oti te huarahi matua i waenga o te tau 2025. Hei mātakitaki i te ataata arorangi o ngā mahi kua mahia, i tēnei marama ko te whakataurite i ngā mahi mai i te Hānuere 2021 ki te Mei 2024, haere ki tā mātau whārangi o ngā mahi.

Whakaupoko: Kei te pai te anga whakamua o ngā mahi i te Eco-Viaduct Bridge, ā, kua tata te putu o te poutoka whakamutunga.

E kaha ana ngā kaimahi horanuku ki te whakatō tipu i te taha o te huarahi matua i raro i ngā āhuatanga mahi uaua.

E tohutohu ana te tohunga rauropi a Caitlin Lavery (wēkete karaka) i ngā ākonga me ngā kaimahi me pēhea te tango tīpako mai i tētahi kōawa pātata ki te wāhi mahi.

Ko ngā mōhio o te kaupapa kei te āwhina i ngā akoranga

Ko ngā ākonga mai i Te Kura o Manukura i mahi i te taha o ngā kaimahi o Te Ahu a Tūranga kia mārama ai ki te rauropi me te kaitiakitanga kua mōhio rātau me pēhea te whakamahi i ēnei mōhiotanga mō ā rātau akoranga.

E toru ngā haerenga atu o tēnei kura o Te Papaioea ki te wāhi mahi i te tau 2024 ki te āwhina i ngā mahi a ngā rōpū rauropi me te kaitiaki.

Ko ngā mōhiohio i riro mai i ēnei haerenga i whakamahia mō ngā aromatawai, ā, i whakaemi, i āta tirotiro ngā raraunga mai i tētahi taiao kua pā ki ngā mahi a te tangata.

I te haerenga tuatahi, i haere ngā ākonga ki te kōawa e tata ana ki te wāhi mahi i Eco-Viaduct, i reira ka tango tīpako rātau. E rere ana te kōawa mā tētahi ngahere māori, ā, kikī ana i ngā kaiora wai, he tohu tērā e kaha ana te mauri o te wai.

I te haerenga tuarua, i tangohia e rātau ngā tīpako mai i te kōawa o Mangamanaia, i te taha ki Woodville o te kaupapa, i taea e rātau te tango tīpako ōrite engari i tētahi kōawa i taua wā.

Nā te whakataurite i te mauri o te wai o ngā kōawa i āwhina kia mārama ngā ākonga ki ngā āhuatanga rerekē ka pā ki te taiao; tirohia e rātau ngā āhuatanga e taea ai te ārai, te huri rānei ngā rerekētanga.

I te haerenga tuatoru, whakamutunga hoki, i haere rātau ki te kōawa 18 i auraratia, kei te Rohe 3, he kōawa horihori tēnei e rere atu ana ki tētahi reporepo.

I tēnei haerenga, i āwhina rātau i te rōpū kaitiaki ki te hopu tuna mō ngā whakamātautau, i whakamahia ērā e ngā ākonga me te kaupapa hei āta tirotiro i te mauri o ngā mea ora o te wai. 

I puta hoki ki ngā ākonga i te kaupapa kaitiaki tētahi tirohanga ao Māori mō te tiaki i te taiao, ā, i pēhea te mahi a tēnei aronga i te taha o ngā tirohanga mātauranga Pākehā o te rōpū rauropi.

I te mutunga o ngā haerenga, i tuku whakaaturanga ngā ākonga ki ngā kaimahi o te kaupapa i te kura e tata ana ki Te Kunenga ki Pūrehuroa, ā, i whakaaturia e rātau ā rātau kitenga mō te ahumahi tūāhanga.

Whakaupoko: E kōrero ana te kaitiaki kaupapa a Cory Skipper ki ngā ākonga e pātata ana ki te wāhi mahi.

Mai i te taha mauī ko Sarina Pratley (NZTA), Stefan Gilmour (HEB), Linda Stewart (NZTA), Brett Gliddon (NZTA), Minister of Transport Simeon Brown, MP o Rangitīkei Suze Redmayne, Lonnie Dalzell (NZTA), Stephen Paewai (Rangitāne ki Tāmaki Nui-a-Rua), Grant Kauri (NZTA) and Jarrod Franklin-Browne (HEB)

Ka haere atu Te Minita Tūnuku ki Te Ahu a Turanga ngā mō te wā tuatahi

I tutuki pai te haere mai tuatahi o te Minita o Te Manatū Waka a Simeon Brown rāua ko te Mema Pāremata o Rangitīkei a Suze Redmayne ki Te Ahu a Turanga: Te Huarahi Matua o Manawatū-Tararua i te marama o Mei.

I whakatauhia rāua e ngā iwi o Te Ahu a Tūranga i te tari o te wāhi mahi pātata ki Ashhurst me te whakamārama hoki i te āhuatanga o te kaupapa ki a rāua.

Kātahi ka heria ngā manuhiri ki te wāhi mahi, arā ko te haere ki runga o ngā papa o te Piriti o Parahaki, ā, i kite rātau i te nui o ngā mahi kua oti i tēnei hanganga nui, me te whakamīharo ki te tirohanga tino rawe o Te Āpiti.

I kite ngā manuhiri i ngā apa tuatahi o te papakū o te kaupapa e whakatakotohia ana i te taha ki Ashhurst, me te kite hoki i te nui o te Karinga 13, te karinga nui rawa ā-rōrahi nei i te huarahi matua, ā, neke atu i te 2.4 miriona mita pūrua te oneone kua nekehia.

I mutu te toronga a te Minita i te Rohe 3, i te Pāmu Kapohau o Te Āpiti, te wāhi e hangaia ana te wheketere papakū hei whakarato i ētahi o ngā papakū mō te hanga i te rori. 

Ko ngā kaitautoko i te Minita me te mema pāremata i taua rā ko ngā kaimahi o te kaupapa, o Waka Kotahi me ngā iwi.

Whakaupoko: I haere ake te Minita o Te Manatū Waka a Simeon Brown rāua ko te Mema Pāremata o Rangitīkei a Suze Redmayne ki te papa o te Piriti o Parahaki Bridge pātata ki te Poutoka1 (taha matau o te pikitia).

Ko ngā ākonga i Te Kāreti o Tararua, i Pahiatua, i te wāhi mahi o te Piriti o Parahaki.

Kei te whiwhi wheako mahi hanganga ngā ākonga i te huarahi matua

E kaha tonu ana te rōpū o Te Ahu a Turanga: Te Huanui o Manawatū-Tararua ki te tuku arawātea mō ngā taiohi o te rohe e kaingākau ana ki ngā mahi tūāhanga me te hangatanga.

I pōhiritia e te kaupapa ngā ākonga kura tuarua mai i Te Kāreti o Tararua me Te Kura Tuarua o Fielding ki te wāhi mahi kia nui atu te mōhio ki ngā mahi e pā ana ki tētahi huarahi matua, ā, kia pā hoki ki ngā mīhini.

I whakahaerehia ngā toronga nei e Talent Central, he hinonga ā-rohe e takawaenga ana i ngā arawātea mahi, whakangungu hoki.

I ngā toronga e rua, i whakatauhia hoki ngā ākonga, ā, nā ngā iwi o te kaupapa i ārahi, i mua i te tuku whakamārama a ngā kaimahi me ngā tāngata o te kaupapa.

Kei waenga i te 300 me te 350 ngā tāngata e mahi ana i Te Ahu a Tūranga puta noa i ngā tūmomo mahi rerekē, tae atu ki te pūkaha, te kari whenua, te rūri, te hoahoa, te arumoni, te oranga, te kaitiaki, ngā mahi tari, te whakaū kounga, te kaimahi ā-ringa, te rauropi me te maha atu.

I aua awa e rua, i te mau ngā ākonga i ngā kākahu haumaru, ā, i heria rātau ki te kite i ngā mahi, otirā i te Piriti o Parahaki i te awa o Manawatū, te hanga i te rori me ngā wāhi kari whenua kua oti (Whakakī 9, Kari 13).

I mutu ngā haerenga i te takiwā Rohe 3, e pātata ana ki Cook Rd, i reira ka kōrero ngā kaiwhakangungu a Geoff Cooke rāua ko Colin Landy ki ngā ākonga mō ngā arawātea mō te whakahaere mīhini me ngā mahi kari whenua e whakaatu ana i ētahi o ngā mīhini nunui, ngā taraka kāta nunui me ngā purutōke.

E mahi tahi hoki tēnei kaupapa me Connexis, he whakarato whakangungu tūāhanga mā ngā kaimahi o te kaupapa, me Fulton Hogan i tētahi taiopenga High-Vis i te marama o Mei. He arawātea te Girls with Hi-Vis mō ngā ākonga wāhine kia whai wāhi ki te ahumahi tūāhanga mā ngā taiopenga mahi ringarehe, tūāhanga hoki.

I raro i te kaupapa nei, 25 ngā ākonga nō Te Kura Kōhine o Te Papaioea, Te Kura Tuarua o Fielding me Cornerstone Christian School i whai wāhi ki te whakarongo ki ngā whakamārama a te Kaiwhakahaere Mahi Whenua o Te Ahu a Tūranga a Clare Miller kātahi ka haere ki te kite i te Piriti o Parahaki i reira ka kōrero ngā kaipūkaha o te wāhi mahi a Emily Kang me Caitlin Bailey ki a rātau mō ā rātau mahi.

Whakaupoko: Kei te whakarongo ngā ākonga me ngā kaimahi mai i Te Kura Tuarua o Fielding ki te kaiako a Goodmans Contractors a Colin Landy e kōrero ana ia mō te mahi i tētahi kaupapa nui.

I haere ake ngā ākonga nō Te Kura Kōhine o Te Papaioea me te Cornerstone Christian School ki te wāhi mahi i raro i te kaupapa Girls with Hi-Vis.

Ētahi atu kōrero

Mō ētahi atu mōhiohio, me whakamahi ko tētahi o ēnei āhuatanga e whai ake:

• nzta.govt.nz/teahuaturanga
• facebook.com/nztacni
• twitter.com/wakakotahicni
• 0800 740 560
• teahuaturanga@nzta.govt.nz